Premyer-liqanın 19-cu turunda "Qarabağ" səfərdə "Sabah"ın qonağı olub - 1:0.

"Football-plus.az" saytının məlumatına görə, qonaqların baş məşqçisi Qurban Qurbanov oyundan sonra mətbuat konfransında iştirak edib. Çalışdırıcı görüş haqda bunları deyib:

- Filip Ozobiçin oyunu haqda nə deyə bilərsiz?

- Bizdə statistikalar var. Ozobiç meydanda ən çox qaçan oyunçulardandı. Ola bilər ki, hansısa epizodda öz zonasında ola bilmirdi. Bəzi epizodlarda düşündüyümüz kimi alınmadı. Amma sona kimi mübarizə apardı. Dediyim kimi, çox intizamlı komandaya qarşı oynadıq. Bizi çox yaxşı təhlil etmişdilər.


- Bu gün "Qarabağ"ın qol epizodları az oldu. Bu sizi narahat edir?

- Ümumilikdə cərimə meydançasına girilən epizodlara baxsaq, 4-5 real qol imkanımız oldu. Sadəcə ola bilər ki, son ötürmə ünvanına çatmırdı. Rəqibin intizamlı oyununu yaddan çıxarmalı deyilik. "Sabah" rəqib oyunçulara ən çox yaxın oynaya bilən komandadı. Rəqibə meydanda istəyini etməyə imkan yaratmırlar. Bu gün futbol elə səviyyəyə gəlib çıxıb ki, biz hər oyun nə 5-6 qol vuran bilərik, nə də 7-8 qol epizodu yarada bilərik. Bəzən bir standart vəziyyət oyunun taleyini həll edir. Ümumilikdə narahatlığım yoxdu. Çünki futbolçuların intizamlı, istəkli olması mənim üçün çox vacibdi. Qarşıda da belə oyunlarımız olacaq.


- Toral Bayramovun durumu necədi?

- Ayağında bir az şiş oldu. Rəqib oyunçu pəncə hissəsinə xəsarət yetirdi. Sabah durumu tam bilinəcək. Ola bilər 3-4 gün məşqlərdən kənar qalsın. Həkimlərin dediyinə görə, çox da ciddi zədə görünmür.


- Bədavi Hüseynovu bu mövsümdə meydanda görə biləcəyik?

- İnşallah, görə biləcəyik. Çünki uyğun bir zaman axtarırıq. Daha yaxşı bərpa olub qarşıdakı matçlarda meydana çıxacaq. Sadəcə, indi ilk dəqiqələrdən risk etmirik. Milli komandaların oyunları ilə bağlı yaranan fasilədə əvəzedici heyətimizlə yoxlama matçında yəqin ki, oynayacaq.


- Rusiya ilə Ukrayna arasında baş verən müharibədən sonra bu ölkələrdə oynayan bir neçə futbolçu azad agent statusu alıb. Menecerlər vasitəsilə sizə oyunçular təklif olunub?

- Heç kimlə ünsiyyət olmayıb, bizə belə məlumat gəlməyib.


- Bədavi Hüseynov əsas heyətin oyunçusu idi. O qayıdandan sonra əsas heyətdən kimin kənarda qalacağı real görünür?

- Futbolçuların özlərindən asılıdı. Hansı stabil olacaq, özünü daha inamlı göstərəcək, o da şans qazanacaq. Mən sevinirəm ki, belə rəqabət olsun.


- Maksim Medvedevi artıq mərkəz müdafiəçisi kimi görürsüz. Onun cinahda oynamaq ehtimalı nə dərəcədədi?

- Daha çox ehtimal mərkəz müdafiəçisi oynamağıdı.


- Abbas Hüseynovun oynamağının səbəbi nədi?

- Rəqibə görə heyət qururuq. Əvvəlki iki matçda Abbas oynamışdı, ondan razı qalmışdım. Bu gün Marko Veşoviçə şans verdim. Hər ikisindən razıyam.