“Əsas klubun futbolçular qarşısında öhdəliyidi” - Aslan Şahgəldiyev
"Keşlə"nin "Şamaxı" olması istiqamətində çoxdan iş gedirdi. Bu prosesin reallaşmasında müəyyən problemlər yaşansa da, artıq məsələ həllini tapıb.
Redaksiyamıza daxil olan məlumata görə, komanda Şamaxıda ilk oyununu aprelin 9-da "Neftçi"yə qarşı keçirəcək. Klubun yeni loqosu da bəllidi və avtobusunun üzərinə də həkk olunub.
Yaranma tarixi 2022-ci il qeyd olunan bir klubun premyer-liqanın 2021/22 mövsümündə necə çıxış edəcəyi maraq doğurur. Yeni yaranan klub “Keşlə”nin topladığı xallar ilə çempionatda necə mübarizəyə qoşula bilər? Bu məsələ ilə bağlı yarışın təşkilatçısı olan PFL-in Mətbuat və İctimaiyyətlə Əlaqələr Departamentinin rəhbəri Aslan Şahgəldiyevin fikrini öyrəndik: “Keşlə” bölgələrdə futbolun kütləviliyinin artırılması məqsədilə “Şamaxı” adı altında eyniadlı şəhəri təmsil etməklə bağlı qərar verib. “Şamaxı”nın “Keşlə”nin varisi sayılması üçün AFFA və “Keşlə” tərəfindən müvafiq qaydada UEFA-ya müraciət olunmuşdu. Artıq addəyişmə ilə bağlı hüquqi prosedur başa çatıb və klub “Şamaxı” adı altında çıxış edəcək. Bununla bağlı əlavə məlumat veriləcək. Klub rəsmən PFL-ə də müraciət edib və futbolçularla bağlanan müqavilələrin maliyyə şərtlərini, həmçinin bütün tələb olunan prosedurları öz üzərinə götürdüyünü bildirib. Bütün bunları rəhbər tutaraq müvafiq qaydada dəyişikliyin edilməsi ilə bağlı tərəfimizdən etiraz yoxdu. Bildiyiniz kimi, “İnter” də “Xəzər Universiteti”nin varisi idi. Klubun loqosunda da 2004 yazılmışdı. Amma “Xəzər Universiteti” 1997-ci ildə yaranmışdı. Sadəcə, klub onu pulla alır. Loqosunu dəyişir. “Keşlə” də Şamaxıya köçür. Orda fəaliyyətə bu il başlayacaqlar. Bu üzdən 2022 yazılıb. Bu sənədlər UEFA-ya da göndərilib. Hansısa problem olsaydı, onlar da icazə verməzdi. Ona görə də bu işdə hansısa problem görmürük. Burda əsas klubun futbolçular qarşısında öhdəliyidi. Onların da hamısını yerinə yetirəcəklər”.
Bu mövzuda həm klubun, həm AFFA-nın, həm də PFL-in mövqeyini öyrəndik. Nəticəni isə siz çıxarın. Təbii ki, hansısa nəticə çıxarmaq mümkünsə!
GÜNAY VƏLİYEVA
Digər xəbərlər
