Niderland təmsilçisinin heyətində üç ciddi itki var. Müdafiənin əsas dayaqlarından biri olan Stiv Lemkin avqustun əvvəlində sıradan çıxıb. O, “Qarabağ”la ilk görüşü də buraxıb. Müdafiəçinin komanda ilə məşqlərə qayıdışının sentyabra təsadüf edəcəyi gözlənilir.
Kristian Hlinsson ilk matçda 61-ci dəqiqədə meydana çıxıb. Yarımmüdafiəçi məhz ağdamlılarla oyunda aldığı zədə səbəbindən bu görüşdə komandasına kömək edə bilməyəcək.
Sam Lammers də ilk qarşılaşmada 61-ci dəqiqədə Vut Veqhorstu əvəzləmişdi. Hücumçu zədə səbəbindən Bakıya səfər edə bilməyib.
“Twente”nin baş məşqçisi Con van den Brom dünən keçirilən mətbuat konfransında hər iki futbolçunun durumuna aydınlıq gətirib:
“Kristianın baldırında zədə var. O, “Qarabağ”la ilk görüşdə sıradan çıxıb. Samın bud əzələsində mikrozədə var. Onlar bu səbəbdən səfərə çıxmağa hazır deyildilər. Evdə məşq edərək növbəti matça hazırlaşmağa çalışacaqlar. Hlinssonun zədəsi daha ciddi olduğundan bərpa prosesi Lammersdən daha uzun çəkəcək”.
İSRAYIL XEYRULLAYEV
