Nəhayət, Antonio Konte istəyinə çatıb. Romelu Lukaku italiyalı məşqçinin yeni komandasında çıxış edəcək.

“Çelsi”nin hücumçusunun “Napoli”yə gözlənilən keçidi rəsmiləşib. İtaliya klubunun mətbuat xidmətinin məlumatına görə, “Napoli” bu transfer üçün “Çelsi”yə 30 milyon avro təzminat ödəyib. 31 yaşlı belçikalı ilə razılaşdırılan müqavilənin müddəti 2027-ci ilin yayınadək nəzərdə tutulub. Qeyd edək ki, Romelu ötən mövsümü icarə qaydası ilə “Roma”da keçirib. O, bütün turnirlərdə 47 matça çıxaraq 21 qol vurub və 4 məhsuldar ötürmə verib. Maraq üçün Lukakunun 2019-21-ci illərdə “İnter”də də Kontenin rəhbərliyi altında oynadığını və bir dəfə İtaliya çempionu olduğunu da yada salaq.

Yeri gəlmişkən, “Napoli”nin hücumçusu Viktor Osimhen “Əl-Əhli”yə keçməyə yaxındı. Fabritsio Romanonun məlumatına görə, Səudiyyə Ərəbistanı klubu 25 yaşlı nigeriyalının transferi ilə bağlı neapollularla razılığa gəlib. Məşhur insayder “Əl-Əhli”nin keçid üçün 75-80 milyon avro ödəyəcəyini də xəbər verib. Osimhen “Napoli”də 2020-ci ildən oynayır. O, bu komandada 133 oyun keçirib, 76 qol vurub və 18 məhsuldar ötürmə verib.