Mövsümlərarası fasilədə 5 futbolçu ilə yolları ayıran, hələ cəmi 4 transfer edən “Neftçi”dən daha bir neçə yeni oyunçu xəbəri gözləyirdik. Ancaq “ağ-qaralar” sürpriz etməyi seçdi. Daha doğrusu, baş məşqçi Yuri Vernidubla yeni müqavilə imzalandı.

Xatırlayırsızsa, ötən il dekabrın 9-da paytaxt təmsilçisinin “sükanı arxasına” keçən ukraynalıyla anlaşmanın müddəti ilyarımlıq idi. Yəni mütəxəssisin hələ qarşıdan gələn “futbol ili”ndə də komandanı çalışdıracağı dəqiq idi. Lakin klub rəhbərliyinin yeni təklifi sözləşmə müddətinin 2028-ci ilin yayına qədər uzadılmasıyla nəticələndi. Vernidub rəhbərliyin müraciətini bu sözlərlə cavabladığını deyir:

Bəs, ukraynalı haqlıdımı? Bəli! Azı ona görə ki, “Neftçi” ikiillik fasilədən sonra yenə avrokuboklarda çıxış edəcək. Özü də Vernidub bu uğura xələfi Samir Abasovun dövründə özünü heç cür yaxşı tərəfdən göstərə bilməyən heyətlə imza atdı. Yəni mütəxəssisin cavabı ümumi mənzərəni bütün çılpaqlığıyla göz önünə qoyur.

Göründüyü kimi, tərəflər arasında qarşılıqlı razılıq var. Vernidub demişkən, niyə olmasın?! Xatırladaq ki, ukraynalı Bakıya təşrif buyuranda “Neftçi” ilk 12 oyunda cəmi 3 qələbə qazanmışdı. Düzdü, komanda qalan oyunların yalnız üçündə uduzmuşdu, lakin ardıcıl xal itkiləri “ağ-qaralar”ı hədəfdən – avrokuboklara vəsiqə qazanmaqdan xeyli uzaqlaşdırmışdı. Yeni baş məşqçinin gəlişi isə ölməkdə olan ümidlərə can verdi. Ardıcıl 8 matçda uduzmayan “ağ-qaralar” məğlub psixologiyasından qurtuldu. Meydanda özünəinamı artan, uğursuzluq qorxusundan qurtulan, məsuliyyəti öz üzərinə götürməyə daim hazır olan komanda görməyə başladıq. “Ağ-qaralar”ın həlledici matçda “Turan Tovuz”a, Azərbaycan derbisində “Qarabağ”a uduzması da Vernidub üçün ciddi maneə yaratmadı. Sanki o “Neftçi”nin bazasına ayaq basar-basmaz koqnitiv yenidənqurmaya start vermiş və qısa müddətdə məqsədinə çatmışdı. Odu ki, indiyə qədər xeyli legioner məşqçi ilə sözün əsl mənasında vaxt itirən, ciddi uğura nail ola bilməyən klub Vernidubun ətəyindən ikiəlli yapışmaqda haqlıdı.

Həqiqətən də Laurentsio Regekampf, Adrian Mutu, Miodraq Bojoviç, Roman Qriqorçuk kimi məşqçilər kluba çox baha başa gəlib, “ağ-qaralar” sözün əsl mənasında uzun müddət yerində sayıb. İndi bu istiqamətdə işıq ucu görən rəhbərlik, təbii ki, hadisələrinin axarının olduğu kimi davam etməsində maraqlıdı. Heç şübhəsiz, indi irəliyə baxmaq lazımdı. Bəs, bakılıları qarşıda nə gözləyir?

Məlumdu ki, “Neftçi” gələn ilin martında yubileyini qeyd edəcək. Əlbəttə, bu ərəfədə azarkeşlərin bayramına bayram qatacaq məqamlar komandanın Konfrans Liqasının əsas mərhələsində çıxış etməsi və çempionluq uğrunda mübarizə aparması olacaq. Lakin hadisələrin axarı hələ bu yöndə böyük ümid vermir. Axı biz hazırda həm son çempion “Sabah”ın, həm də mövsümü titulsuz başa vuran “Qarabağ”ın hazırlıq prosesini izləyir, növbəti “futbol ili”ndə də yetərincə güclü və iddialı olacaqlarını asanlıqla təxmin edirik. Belədə “ağ-qaralar”ın daha inamlı, daha diqqətli olması əsas şərtdi ki, kollektiv hələ bu istiqamətdə ləng hərəkət edir. Bununla belə, yeni müqavilə böyük ehtimalla həm də Vernidubun daha çox pul qazanması deməkdi. Deməli, ukraynalının məsuliyyəti də əvvəlkindən artıq olmalıdı. Sevindici haldı ki, mütəxəssis klubla bağlı bütün açıqlamalarında “Neftçi”nin əzəmətini xatırladır, onu layiq olduğu yerlərə daşımağın mümkünlüyünü dilə gətirir. Nəticədə həm də azarkeşlərin könlünə yol tapır, belə demək mümkünsə, “ağ-qaralar”la bütövləşir.

Hadisələrin axarının daha böyük uğurlarla nəticələnməsi üçün isə işlərə davam etmək lazımdı. Bu gün klub rəhbərliyinin Verniduba böyük etimad göstərdiyinə, komandanın formalaşdırılmasıyla bağlı qərarlarına hörmətlə yanaşdığına şübhə yoxdu. Hədəfə çatmaq üçün istənilən cür əlverişli şəraitin yaradılmasından isə bəhs etməyə belə dəyməz. Hər halda, “Neftçi” ölkəmizin yağ-bal içində yaşayan üç komandasından biridi.

İndi futbol dili ilə desək, top Vernidubdadı. Görək, xeyli dirçələn “Neftçi” əzəmətini bərpa etmək yönündə növbəti addımlarını atacaq, yoxsa 2025/26 mövsümü, sadəcə, şirin yuxu kimi yaddaşlarda qalacaq?

KƏNAN BAHADIR