Türkiyə çempionu ''Qalatasaray'' bu yayın ilk transferini həyata keçirmək üzrədi. İstanbul nəhəngi ötən mövsümün ilk dövrəsini ''Fənərbaxça''da, ikinci dövrəsini ''Zenit''də keçirən Con Duran ilə ilkin anlaşma edib. Baş məşqçi Okan Buruk da bu transferə razılıq verib və özü şəxsən 22 yaşlı forvardla telefonda söhbət edərək onu komandasına dəvət edib. Türkiyə mənbələrinin yazdığına inansaq, kolumbiyalı futbolçu ''Cim-Bom''da illik 4 milyon avro qazanacaq. Duran əslində problemli hücumçu sayılır və hələ də özünü tam olaraq sübut etməyib. Amma onun səviyyəsinə söz ola bilməz. Həm də Türkiyə futbolunu yaxından tanıması, maaşının uyğun olması və yaşının legioner limitinə uyğun olması üzündən ''Qalatasaray'' ona üstünlük verib. Məlum olduğu kimi yeni mövsümdə ''10+4'' limiti tətbiq olunacaq. İştirak ərizəsinə salınan 14 legionerdən 4-ü ən azı 2003 təvəllüd olmalıdı. ''Sarı-qırmızılar'' Duranı birillik icarəyə götürəcək. Bu transfer iyulun əvvəllərində rəsmi olaraq açıqlanacaq. Duranın transferi İkardinin ''Qalatasaray''da qalıb-qalmayacağı ilə əlaqəli deyil. Argentinalı hücumçu qalsa belə Duran yenə də transfer ediləcək. Müqavilə ilə ''Əl-Nəssr''ə məxsus olan və Səudiyyə Ərəbistanında illik maaşı 20 milyon avrodan çox olan Duran ''Fənər''də 21 rəsmi oyuna çıxaraq 5 qol, 3 məhsuldar ötürməlik performans sərgilədi. Onun xüsusilə ''Beşiktaş'' və ''Qalatasaray''la derbilərdə vurduğu vacib qollar yaddaqalan olmuşdu.