Bugünlərdə “Kayzerslautern”in yeni mövsüm üçün hazırlığa başladığını, ancaq Mahir Emrelinin hələ düşərgədə olmadığını, daha dəqiqi, Türkiyə tətilini davam etdirdiyini yazmışdıq. Sonradan aydın oldu ki, 2-ci bundesliqa təmsilçisinin baş məşqçisi Torsten Liberknext milliyə çağrılanlara, eləcə də Mahirə əlavə bir həftə istirahət vaxtı verib.

Bəs, Mahir düşərgəyə qayıdacaqmı? Başqa kluba keçmək ehtimalı nə dərəcədə böyükdü?

Bu suallarla 29 yaşlı hücumçunun anası Elnurə Emreliyə müraciət etdik. Onun “Football-plus.az”a cavabı:

“Mahir hazırda Türkiyədədi. Məlum olduğu kimi, istirahəti davam edir. İyulun 5-də birbaşa Almaniyaya yollanacaq və 6-da düşərgədə məşqlərə başlayacaq. Hələ ki başqa hansısa klubla razılıq əldə etməyib”.

Xatırladaq ki, “qırmızı iblislər”in idman direktoru Marsel Klos sərfəli təklif olarsa, Mahirlə yolları ayırmağa hazır olduqlarını deyib. Liberknext rəhbərlikdən onun ya satılmasını, ya da icarəyə verilməsini istəyir.

KƏNAN BAHADIR