“Əfsanə zolaqlı” adını daşıyan 2026/27 mövsümünün ev oyun dəsti, “Neftçi”nin 90 illik tarixinə ehtiram əlaməti olaraq, klubun əfsanəvi ağ-qara zolaqlarını yenidən meydanlara qaytarır.

"Football-plus.az" xəbər verir ki, klub tarixində ən çox istifadə olunan və “Neftçi” kimliyinin ayrılmaz simvoluna çevrilən zolaqlı forma yeni mövsümdən etibarən yenidən əsas ev forması kimi istifadə olunacaq.

Klub bildirir ki, “Kappa” tərəfindən eksklüziv olaraq “Neftçi” üçün hazırlanan formada ağ rəngin üstünlük təşkil etdiyi klassik dizayn klubun zəngin keçmişi ilə gələcəyə olan iddiasını bir araya gətirir. Formanın boyun hissəsində “Neftçi”nin 90 illik yubileyinə həsr olunmuş xüsusi loqo yer alır. Bu detal klubun şanlı tarixini, nəsilləri birləşdirən irsini və yubiley mövsümünün ruhunu əks etdirərək formaya xüsusi məna qazandırır.

“Əfsanə zolaqlı” sadəcə yeni forma deyil. Bu forma “Neftçi”nin tarixini, kimliyini və ənənələrini gələcəyə daşıyan bir simvoldu, O, illərin xatirəsidi. Tribunaların səsi, minlərlə ürəyin eyni anda döyüntüsüdü.

Bu zolaqlar əfsanələrin çiyinlərində tarix yazıb. Kapitanların qəlbində xarakter qazanıb. Bu zolaqların arasında qələbə sevinci, kədərli anlar, yenidən ayağa qalxmaq əzmi, heç vaxt təslim olmamaq ruhu var.

Nəsillər dəyişir, stadionlar dəyişir, amma dəyişməyən bir şey qalır - kimliyimiz. O, “Neftçi” üçün irsdi, xarakterdi, bir ömürlük sevgidi. Bu gün isə tarix yenidən öz rənglərinə qayıdır.