Ayxan Abbasovun “Turan Tovuz”dan ayrılması klubun gələcəyi ilə bağlı qəribə iddiaların yayılmasına səbəb olub.

Bildilir ki, baş məşqçinin yoxluğu xeyli futbolçunun komandanı tərk etmək istəməsiylə nəticələnib. Qısası, onlar mütəxəssisin yoxluğunda “bozqurd”un uğurları üçün çalışmaq istəmir.

Belədə heyətə göz gəzdirməyi lazım bildik. Hər halda, müqavilə müddətinin başa çatıb-çatmaması kimi vacib məqam var ki, bu məqam oyunçuların qərarına böyük təsir göstərəcək. Məlum oldu ki, Roderik Miller, Aleks Souza, Otto Con və Sadiq Şəfiyevdən başqa bütün futbolçuların klubla müqavilə müddəti iyunun sonunda başa çatır. Yəni “Turan Tovuz” futbolçularıyla anlaşa bilməyəcəyi təqdirdə komandada cəmi 4 nəfər qala bilər!

Şübhələrə son qoymaq üçün “Turan Tovuz”un mətbuat xidmətinin rəhbəri Süleyman Tağıyevə müraciət etdik. O, komandanın istirahət etdiyini və bu barədə dəqiq fikir bildirməyin mümkün olmadığını dedi.

KƏNAN BAHADIR