Futbol tarixinin ən böyük ulduzlarından biri - Kriştiano Ronaldo Səudiyyə Ərəbistanı karyerasında şok dalınca şok yaşamaqda davam edir.

Onun şərəfini qoruduğu ''Əl-Nəssr'' bir neçə gün öncə çempionluğu rəsmiləşdirməyə hazırlaşarkən son saniyələrdə qol buraxdı. Dünən isə ''Əl-Nəssr'' ''Asiya Çempionlar Liqası 2'' adlı turnirin finalında Yaponiya təmsilçisi ''Qamba Osaka'' ilə qarşılaşdı. Bu, səviyyəcə Asiyanın ən güclü ikinci turniri hesab olunur. Yəni bir növ Avropa Liqasını xatırladır.

Özü də oyun Səudiyyə Ərəbistanının paytaxtı Ər-Riyadda keçirildi. Heyətində Ronaldo, Feliş, Mane kimi ulduzlar olan və başında Jorje Jezuş kimi təcrübəli bir məşqçi dayanan ''Əl-Nəssr'' nəinki qələbə qazana, heç qol da vura bilməyərək böyük bir fiasko yaşadı! 30-cu dəqiqədə türkiyəli forvard Dəniz Hümmətin vurduğu qol nominal qonaqlara sürpriz qələbə qazandırdı.

''Əl-Nəssr'' qapıya 20, ''çərçivə''yə 6 zərbə vurmasına və 1,76 xG yaxalamasına baxmayaraq rəqib qapıya yol tapa bilmədi. Bütün oyunu müdafiə olunan, ''çərçivə''yə yalnız 1 zərbə endirən və cəmi 0,12 xG yaxalayan ''Qamba Osaka'' isə turnirin qalibi oldu. Tarixində ilk dəfə bu turnirdə zəfər əldə edən Osaka klubu ümumiyyətlə 2015-dən bu yana ilk titulunu qazandı. 2023-dən ''Əl-Nəssr''in şərəfini qoruyan Ronaldo bu müddət ərzində 14-cü dəfə titul qazanmaq şansını əldən verdi! İndiyə qədər o, ölkə çempionatı, Asiya Çempionlar Liqası, ölkə kuboku və ölkə superkubukunun heç birini qazana bilməyib.

''Əl-Nəssr'' bu müddət ərzində yalnız qeyri-rəsmi xarakter daşıyan Ərəb Ölkələri Kuboku adlı turnirdə qalib olub. Maraqlıdı ki, matçın ardından 41 yaşlı futbolçu gümüş medalların təqdim olunması mərasiminə qatılmadı. Onun yerinə komandanı baş məşqçi Jezuş arxasınca apardı. Ronaldo isə kapitan sarğısını çıxardaraq birbaşa paltardəyişmə otağına yollandı. Müqayisə üçün bildirək ki, ''Əl-Nəssr''in heyətinin dəyəri 135 milyon avro, ''Qamba Osaka''nın heyətinin dəyəri isə cəmi 15,4 milyon avrodu.

Qələbə qolunun müəllifi olan Dəniz Hümmət yaxın keçmişdə heç Türkiyənin ortabab klubu ''Çaykur Rizəspor''da da özünü göstərə bilməyərək doğulduğu İsveçə qayıtmalı olmuşdu. ''Əl-Nəssr'' nəhayət, gələn həftə ilk ciddi titulunu qazana bilər.

Komanda Səudiyyə Ərəbistanı çempionatında son tura lider kimi daxil olub. Ər-Riyad təmsilçisi evdə ''Damak''ı məğlub etsə, çempion olacaq.