Aprelin 30-da keçirilən “Neftçi” – “Qarabağ” oyununun nəticəsinə görə çempionluğu dəqiqləşən “Sabah” yeni status altında ilk oyunu mayın 3-də Şamaxıda keçirdi. “Şamaxı”nın oyunçuları sağ olsun, “bayquşlar” üçün şərəf dəhlizi açdılar, onları alqışladılar.
Srağagün isə “Sabah” çempion kimi ilk ev oyununa çıxdı. “Kəpəz”lə oyunun nəticəsinə baxsaq, hətta bəlkə dodaq büzmək olar ki, çempionluq “Sabah”a düşmədi. Ümumiyyətlə, oyun ətrafındakı ab-hava qəribə idi: sanki Masazırda meydana yeni çempion çıxmamışdı, Region Liqasının yarımfinal oyunu keçirilirdi. Tribunalarda anşlaq olması bir tərəfə, azarkeş sayı heç 1000-ə də çatmadı. Azarkeşlər yeni çempionun şərəfinə nə hansısa maraqlı pankart açdı, nə də mahnı səsləndirdi. Heç olmasa, “Neftçi”yə yanıq vermək üçün seçdikləri “Bu şəhər ikimizə dar...” mahnısını səsləndirsəydilər, bir qədər feyziyab olardıq. Belə çıxır ki, masazırlılar da ancaq mərkəzi qarşılaşmaları izləməyə gəlir. Yoxsa çempionluq, çempion komanda - buna dəyər verən azdı…
MÜZƏFFƏR QULUZADƏ