La Liqanın 36-cı turunda ''Real'' autsayder ''Ovyedo''nu qəbul etdi.

Ötən tur ''Barselona''ya uduzmaqla çempionluq şansını itirən Madrid nəhəngi Qonsalo Qarsiya və Cud Bellingemin qolları ilə 2:0-lıq qələbə qazandı. Bu nəticə ilə ''Ovyedo''nın aşağı liqaya yuvarlanması rəsmən təsdiqlənib.

Gözlənildiyi kimi ''Bernabeu''dakı matç gərgin ab-havada keçdi. Fanatlar həm futbolçulara, həm də prezident Florentino Peresə etirazlarını bildirdilər. Vinisius az qala hər topa toxunduqda stadiondan uğultu səsləri gəlirdi. Mbappe isə ikinci hissədə - 69-cu dəqiqədə meydana daxil olarkən ''Bernabeu''da fit səslərindən qulaqlar cırnayırdı. Qeyd edək ki, fransalı superulduzun ''Real''ı tərk etməsi üçün yaradılan petisiyanı artıq 40 milyondan (!) çox insan imzalayıb. Oyunun start fiti ərəfəsində VİP-lojada əyləşən Florentino Peresin ayağa qalxaraq fanatlardan biri ilə ciddi şəkildə mübahisə etməsi diqqətdən qaçmadı.

Bundan başqa tribunada üzərində ''Florentino, indi get'' yazılmış nəhəng bir pankart açıldı. Amma təhlükəsizlik xidməti işçilərinin müdaxiləsindən sonra həmin pankart yığışdırıldı. Bütün bunlar bir daha onu göstərir ki, ardıcıl ikinci mövsümü tutulsuz başa vuran ''kral klubu''nda yayda çox ciddi dəyişikliklər gözlənilir.