“Şalke-04” 1-ci bundesliqaya vəsiqə qazandı. Mayın 2-də, 32-ci turda evdə “Fortuna”ya 1:0 hesabıyla qalib gələn Helzenkirhen klubu xalını 67-yə çatdırmaqla elita iştirakçıları sırasına qoşuldu.

Almaniyanın ən titullu klublarından biri 1-ci bundesliqanı 2022/23 mövsümünün sonunda, 17-ci yeri tutmaqla tərk etmişdi. Ardından “Şalke-04”ü əzablı yollar gözləyirdi: komanda növbəti mövsüm 2-ci bundesliqada 10-cu yeri tutdu, 2024/25 mövsümündə isə 14-cü olmaqla az qala 3-cü bundesliqaya yuvarlanacaqdılar.

Bütün bu müddət ərzində “şaxtaçılar” təkcə yaşıl meydanda fırtına yaşamadı: rəhbərlik səviyyəsində istefalar sıralandı, tez-tez məşqçi dəyişdi. Yalnız 2025-ci ilin mayında Miron Musliçin baş məşqçi postuna gəlişi ilə sabitlik bərpa olundu. Avstriyalı əvvəllər “Serkl-Brügge”ni avrokuboklara çıxarıb və “Plimut”la İngiltərə kubokunda “Liverpul”u mübarizədən kənarlaşdırıb.

“Şalke-04” onun rəhbərliyi altında əməlli-başlı canlandı. 14-cü turda 1-ci pilləyə yüksələn komanda zirvəni yalnız bir dəfə tərk etdi. 2025/26 mövsümünün sonucu elitaya vaxtından əvvəl – sona iki tur qalmış qazanılan vəsiqə oldu. Klubun sosial şəbəkə hesabları bu uğura heyranlığını gizlətməyən helzenkirhenli azarkeşlərin sevinc şərhləri ilə doludu. Bundan başqa, klub artıq Musliçlə müqavilə müddətinin uzadıldığını da elan edib. Qeyri-adi nəsə baş verməsə, avstriyalı mütəxəssis 2028-ci ilə qədər “sükan arxasında” olacaq.

Sözsüz, “Şalke-04”ün dönüşü 1-ci bundesliqa üçün əla xəbərdi. “Şalke-04” həm statusuna, həm də azarkeş sayına görə böyük klubdu. Komandanın ən çətin dönəmlərində belə stadion dolub-daşıb. Helzenkirhen təmsilçisi 2023/24 mövsümündə hər ev oyununa orta hesabla 61 min azarkeş toplamaqla bu göstəricidə Avropada 16-cı yeri tutub. “Şalke-04” belə yüksək nəticəyə nail olan yeganə 2-ci liqa təmsilçisidi, hətta “Mançester Siti”ni də arxada qoyub.

Təbii ki, komandanı elitaya çıxaran futbolçuların kimliyi də maraqlıdı. Yəqin ki, ilk növbədə “Liverpul”un sabiq qapıçısı Loris Kariusun adını çəkməliyik. O, 2025-ci ilin yanvarında komandaya qoşulub və dərhal da əsas heyətdə özünə yer edib. Cari mövsümdə meydana çıxdığı 29 oyunun 12-də qapısını toxunulmaz saxlayıb. Edin Cekonun personası da az maraq doğurmur. 40 yaşlı bosniyalı hücumçu “şaxtaçılar”a bu ilin yanvarında azad agent kimi qoşuldu və itib-batmadı – 9 oyunda 6 qol vurdu.

Ancaq komandanın əsas zərbə gücü forvard Kənan Karamandı. Türkiyəli futbolçu son üç mövsümün hər birində 2-ci bundesliqda ən azı 13 qol vurmaqla kapitan sarğısını haqq etdi. İndi isə bu uğuru elitada təkrarlamağa çalışacaq. Məşum 2022/23 mövsümündə cəmi bir dəfə fərqlənmişdi. Şəxsi statistikanı yaxşılaşdırmaq üçün əsas var.

Qarşıdan yay “transfer pəncərəsi” gəlir. Bu müddətdə komandanın heyəti ilə bağlı çox şey dəyişə bilər. Ancaq bir məqam heç bir halda şübhə doğurmur: bundesliqada maraqlı komandaların sayı bir vahid artdı!