Bu gün futbol ictimaiyyətinin gözü “Palms Sports Arena”da olacaq: “Sabah”la “Zirə” kubokun finalında üz-üzə gələcək.

Bəs bu oyunun favoriti kimdi? Üstün tərəf hansıdı?

Əlbəttə, kağız üzərində “Sabah” qələbəyə daha yaxındı. “Bayquşlar” meydana çempion statusu ilə çıxır, heyəti daha güclüdü, üstəlik Valdas Dambrauskas amili də var. Litvalı mütəxəssis 4 Superkubok, 3 kubok (cəmi 7) qazanıb, 4 dəfə çempion olub. Bir sözlə, bu baxımdan Rəşad Sadıqovu aşkar üstələyir.

Son kubokunu 2018/19 mövsümündə RFŞ-nin “sükanı arxasında” qazanıb. Onun komandası finalda “Ventspils”i üstələyib. 120 dəqiqədə qol vurulmayıb, Riqa təmsilçisi penalti seriyasında 5:4 üstün olmaqla Latvia kubokunu qazanıb.

İki dəfə isə Litvada bunu bacarıb. 2014/15 mövsümündə finalda “Jalgiris”in baş məşqçisi kimi “Atlantas”ı, 2015/16 mövsümündə isə “Trakay”ı məğlub edib. Bu matçın taleyi əlavə vaxtda həll olunub. Yəni üç kubokdan ikisini 90 dəqiqə başa çatandan sonra qazanıb.

“Zirə” də iki dəfə final oynayıb, birində penalti seriyasında uduzub. Amma “qartallar” bu mövsüm kubokda daha inamla irəliləyir. Rəşad Sadıqovun komandası 1/8 finalda hazırda turnir cədvəlində geri qaldığı “Neftçi”ni məğlub edib. “Sabah” isə kubokda mübarizəyə 1/4 final mərhələsindən başlayıb. Zirəlilər bu mövsüm kubokda bir qol da buraxmayıb. “Neftçi”nin ardından “Sumqayıt”la “Turan Tovuz”u da sıradan çıxarıb.

Rəşad Sadıqov “beşli” müdafiə sistemi ilə oynasa, həmkarının işi çox çətin olacaq. Son çempionat qarşılaşmasında (2:2) olduğu kimi. Elçin Əlicanov, Hacıağa Hacılı kimi futbolçular belə anlarda Sadıqovun köməyinə çatır. Amma Rəşad bəy ötən gün oyunöncəsi mətbuat konfransında Hacıağanın oynamayacağını bildirdi.

Möcüzə olmasa, İssa Cibrila start heyətində yer alacaq. “Zirə” bu mövsüm onun iştirak etdiyi heç bir oyunda məğlub olmayıb. Fantastik statistikadı. Mövsüm ərzində Cibrila ümumilikdə 19 (çempionatda 16, kubokda 3) oyuna çıxıb, “Zirə” bunların heç birində uduzmayıb.

“Sabah” nə qədər güclü görünsə də, bu faktlar da “Zirə”nin favorit olduğunu göstərir. Bu arada 14 ildən sonra ilk dəfə kubokun finalında paytaxt təmsilçiləri qarşılaşır. Sonuncu dəfə 2012-də “Bakı” ilə “Neftçi” üz-üzə gəlmişdi.

“Sabah” – “Zirə” oyunu Bakı derbisidi. Əsl derbi. Görəsən, “bayquşlar” “Neftçi”nin ardından “qartallar” üçün də Lalə Məmmədovanın “Bu şəhər ikimizə dar” mahnısını səsləndirə biləcəkmi?

MÜZƏFFƏR QULUZADƏ