Misli premyer-liqasının 31-ci turunda “Şamaxı” səfərdə “Neftçi”yə məğlub oldu - 0:3.

“Football-plus.az” xəbər verir ki, oyunsonrası mətbuat konfransında qonaqların baş məşqçisi Ayxan Abbasov media önünə çıxıb.

- Rəqibi təbrik edirəm. Layiqli qələbə qazandılar. Final oyunu kimi yanaşırdılar. David Santosun zədələnməsi motivasiyada problem yaratdı. Ona şəfa diləyirəm. Son oyunlar formal xarakter daşıyır. Gənclərin də belə atmosferdə oynaması xoş oldu.

- Sanki son oyunlarda köklənmə problemi var…
- İki oyunda 6 qol buraxsaq da, bura qədər ən az qol buraxan 4-5-ci komanda idik. Güclü rəqiblərə qarşı oynadıq. Futbolçular yorulub. Mövsüm gərgin keçdi. Futbolçular tətili gözləyir (gülür). Rəqib üçün final oyunu idi. Ağır qrafikdə futbolçularım canlarını qoydular. Onlardan razıyıq. Azarkeşlərimizə də təşəkkür edirəm.

- Mövsümün əvvəlindəki “Neftçi” ilə matç daha çətin idi, yoxsa indi?
- 3-4 tur əvvəl də 2:2 bitmişdi. O oyunun dərininə getsək, rəqib bizdən elə də fərqlənmirdi. Sonu dramatik olmuşdu. “Neftçi” son oyunlarda uğurlu çıxış edir. Avrokubok yolunu açır. “Neftçi” Azərbaycanın tarixidi. Bu komandadakı futbolçular ən yaxşılardan olmalıdı.

- Mövsümün sonunda “Şamaxı”dan gedəcəyinizi inkar etməsəz də, klubun idman direktoru Kamran İsmayılov yeni müqavilə təklif edəcəklərini deyir. Mümkün təklif sizi fikrinizdən döndərə bilər?
- (gülümsəyir). Qışdan bu fikirlər var ki, yayda nə olacaq. Klubla danışmışıq, müzakirələr olub. İnşallah, xallar qazanıb ayrılaram (gülür).

- “Şəfa”dan sizə təklif gəlib?
- Yox, elə söhbət olmayıb. Millidə bizi ağır oyunlar gözləyir.

MÜZƏFFƏR QULUZADƏ