"Şamaxı" Misli premyer-liqasının 27-ci tur matçında "Araz-Naxçıvan"ın meydanından "sülh"lə ayrıldı - 1:1.

"Football-plus.az" xəbər verir ki, "şirlər"in baş məşqçisi Ayxan Abbasov oyunsonrası mətbuat konfransında jurnalistlərin suallarını cavabladı.

- Qarşısına avrokubok hədəfi qoyan komandalara qarşı oynamaq çətindi. Çempionat sona yaxınlaşdıqca hər kəs oyunlara final kimi yanaşır. Azarkeşlərimizə təşəkkür edirəm. Ağır qrafikdə idik. Bizim üçün böyük dəyişikliklər etmək çətindi. Uzun müddətdi təbii örtüklü meydançada oynamırdıq. İlk dəqiqələrdə bunun çətinliyi hiss olunurdu. Rəqib üstün olsa da, real qol epizodu bizdə oldu. Təəssüf ki, istifadə edə bilmədik. Daha sonra kobud səhvdən qol buraxdıq. İkinci hissədə futbolçularımdan razı qaldım. Bəlkə də 3 xalı əldən verdik. Hər iki komanda 1 xal qazandı. Bizim üçün vacib xaldır. Bu stabilliyi qorumalıyıq.

- U-21 millisinin baş məşqçisi təyin olundunuz. Klubdakı işinizə davam edəcəksiz?
- Millidə çalışmaq mənim üçün şərəfdi. Bu vəzifəni daşımağa canla-başla razı oldum. AFFA rəhbərliyinə təşəkkür edirəm. Mövsümün sonuna qədər "Şamaxı"dayam. "Şamaxı" rəhbərliyi gənclərin oynaması üçün alışıb-yanır. Biz yayda gənc oyunçuların çox olmasını istəyirdik. Təəssüf ki, hamısını gətirə bilmədik. Qarşıdakı aylarda müzakirə edəcəyik. Gələn il gənc futbolçuların oynaması çətin olacaq. Artıq premyer-liqada legioner limiti ləğv olunub. Klubla, federasiya ilə müzakirə edib ən yaxşı qərarı verəcəyik.

- İki işi icra etmək çətin olmayacaq?
- Yox. U-21-in təlim-məşq toplanışı olacaq. Vaxtımız azdı. Köməkçilərimlə bu işin öhdəsindən gələcəyik. Elnur Çodarovla Kamil Qafarov bu təlim-məşq toplanışında mənimlə birlikdə olacaq. "Şamaxı"da 6-7 məşqdə iştirak etməyəcəm. Bu da problem olmayacaq. Növbəti toplanışlarda yeni köməkçilər olacaq.

- Milli fasilə "Şamaxı"nın işinə yarayacaq?
- Bu suala cavab vermək çox çətindi. Nəticələrdən sonra biləcəyik. Ağır qrafikdə oynadıq. Məncə, 3-cü dövrə bizim üçün pis keçmədi. Futbolçuların istirahətə ehtiyacı var. İnanıram ki, fasilə xeyrimizə olacaq.

- Belə iddialar var ki, "Şamaxı" U-21 millisinin bazası olacaq. Klub rəhbərliyi buna razıdımı?
- Klubun mənafeyini qoruyacağıq. Mütləq şəkildə komandada legionerlər olacaq. Elə bir fikir yoxdu ki, "Şamaxı"da yalnız gənc futbolçular oynasın. Amma istəyərdim ki, U-21 millisinə namizəd bir çox futbolçular mənimlə işləsin. 1-ci liqada və ya əvəzedicilər liqasında məşq edib oynamaqla premyer-liqa klubunda məşq edib oynamaq eyni deyil. Gənc futbolçuların oynaması önəmlidi. Amma onların yanında kimlərin olması da vacibdi. Sintez eləmək istəyirik.

- Fernando Santuşla görüşmüsüz?
- Yox, görüşüm olmayıb. Təyinatım bu gün rəsmiləşib. A milli ilə mütəmadi əlaqədə olmalıyıq. Çox istəyirəm ki, Santuşla görüşüm, əlaqəmiz olsun. Bu, məncə, millinin xeyrinə olar.