"Sabah" premyer-liqanın 31-ci turunda evdə "Kəpəz"ə uduzdu - 0:1.

"Football-plus.az" xəbər verir ki, "bayquşlar"ın baş məşqçisi Valdas Dambrauskas oyunsonrası mətbuat konfransında jurnalistlərin suallarını cavabladı.

- "Kəpəz"i təbrik etmək istəyirəm. Bu qalibiyyət onlar üçün çox böyük uğur idi, çox böyük qələbə idi. Bu gün nəsə çox şey demək istəmirəm. İlk hissədə daha çox dominant, daha yaxşı oynayan tərəf biz idik. Sadəcə künc zərbələrindən 3-4 qol fürsətimiz oldu ki, "Kəpəz"in qapıçısı çox yaxşı çıxış etdi, qol vurmağa imkan vermədi. İkinci hissədə müəyyən dəyişikliklər etdik. Amma bundan sonra oyun ritmimiz kifayət qədər düşdü. Daha sonra anlaşılmaz səhv buraxdıq. Belədə, rəqib fərqləndi. "Kəpəz" öz qapısına tərəf çəkildi. Hücumlar zamanı səbirli olmalıydıq, amma bəzən tələsirdik. Bütün bunları unutmalıyıq. Düzdür, bir balaca üzgünük. Çünki uzun müddətdi məğlubedilməzliyimiz var idi. Amma üzülməyə vaxt yoxdu. Qarşıdakı vacib final oyununa hazırlaşmalıyıq.

- Demək olar ki, bəzi futbolçuların fikri kubokun final matçında idi? Bu, onların performansına təsir etmişdi?
- Əlbəttə, müəyyən mənada fikrinizlə razıyam. Bu gün daha çox az oynayan futbolçulara şans verdik. Risk etmək istəmədik, çünki zədəlilər ola bilərdi. Amma onlar da bu gün göstərməliydilər ki, öz keyfiyyətləri necədi, nə edə bilərlər. İstədiklərimizə bu gün müvəffəq ola bilmədik. Amma onların davranışından, göstərdikləri cəhdlərdən şikayət edə bilmərəm. Adicə bir oyunçunu dəyişəndə, komandada dinamika necə düşür... Təsəvvür edin, 5-6 oyunçu dəyişirsən. Bu isə asan deyil. Bu gün meydana çıxan heyət 5-6 oyun ardıcıl birlikdə çıxış etsəydilər, fərqli mənzərəyə şahid olardız. Sabah bərpa məşqimizi keçəcəyik. İnkişaf etdirməli olduğumuz məsələlər üzərində işləyib, çərşənbə günü keçiriləcək matçı izləyəcəyik.