Karyerasını ''Olimpiakos''da davam etdirən tanınmış türkiyəli futbolçu Yusuf Yazıcıdan yenə üzücü bir zədə xəbəri gəlib. Bir dönəm Türkiyə yığmasına da dəvət alan təcrübəli oyunçunun diz bağları qopub! Bu üzdən o, yenidən uzun müddətə sıradan çıxıb. Klub yaydığı bəyanatla bu xəbəri təsdiqləyib. Bu olay ''Olimpiakos''da böyük üzüntü ilə qarşılanıb. 29 yaşlı futbolçu daha öncə də həmin dizində problem yaşamışdı. Yunanıstan mətbuatının yazdığına inansaq, Yusuf cümə axşamı baş tutan məşqdə dizində ağrılar hiss edib. Klub həkimləri tərəfindən keçirilən tibbi müayinə zamanı isə onun diz bağında yırtıq aşkarlanıb və əməliyyat olunmasına qərar verilib. Yusuf Yazıcı ''Olimpiakos'' karyerasının əvvəllərində də bənzər şanssızlıqla üzləşmişdi. 2024-cü ilin oktyabrın 27-də o, ''Asteras'' ilə oyunda da dizindən ciddi zədə almış və mövsümün qalan hissəsini boşa vermişdi. Əslində bu mövsümü türkiyəli üçün uğursuz saymaq olmaz. Keçirdiyi zədələrə rəğmən Yazıcı bu mövsum 27 rəsmi oyunda 557 dəqiqə oynamaq şansı qazanıb və aktivinə 6 qol, 7 məhsuldar ötürmə yazıb. Yəni o, orta hesabla hər 57 dəqiqədə bir məhsuldar hərəkətlə fərqlənib. Bu, ''Trabzonspor''un yetirməsinin peşəkar karyerasındakı üçüncü ağır diz zədəsidi. O, 2019-un dekabrında ''Lill''də çıxış etdiyi dönəmdə də dizindən əməliyyat olunmuşdu.