“Neftçi”yə transfer qadağası qoyuldu, klub rəsmisi azarkeşləri narahat olmamağa çağırdı
Srağagün ölkə futbolunu "Neftçi" ilə bağlı yayılan şok xəbər silkələdi. FİFA-nın saytında dərc olunan məlumatdan belə aydın oldu ki, ali futbol qurumu mayın 5-dən etibarən bir neçə başqa klubla yanaşı, bakılılara da qarşıdakı üç "transfer pəncərəsi"ni əhatə edən qadağa qoyub.
Başqa sözlə, klub gələn mövsümün sonu da daxil olmaqla yeni futbolçu ilə anlaşa bilməz. Bu o deməkdi ki, cəza müddəti dəyişməsə, “Neftçi” yeni oyunçu transferini yalnız 2028-ci ilin qışından etibarən həyata keçirə biləcək. Düzdü, cəzanın səbəbi açıqlanmayıb. Lakin bəllidi ki, belə qərarlar ya klubun hazırkı və ya sabiq futbolçuları, məşqçiləri qarşısında borclarına, maliyyə tələblərini pozmasına görə qəbul olunur. "Ağ-qaralar"ın mətbuat xidmətinin rəhbəri Asəf Zeynallının sözlərinə görə, tətbiq olunan qadağa qısa müddətdə aradan qaldırılacaq. Səbəb isə fərqli deyil. Bakı təmsilçisi tərəfindən həqiqətən də gecikmiş transfer ödənişi var imiş. Lakin ödəniş artıq həyata keçirilib:
"Transfer ödənişi gecikəndə FİFA-nın müvafiq portalı avtomatik klubu qırmızı siyahıya salır və transfer qadağası tətbiq olunur. Bu, dünya praktikasında tez-tez rast gəlinən məsələdi. Əsas öhdəliklər bağlanandan sonra qadağa avtomatik aradan qalxır. Artıq biz tərəfdən ödəniş həyata keçirilib, qarşı tərəf təsdiqlədikdən sonra qadağa təxminən 3-5 gün ərzində götürüləcək. Narahatlığa əsas yoxdu. Hazırda borc öhdəliyimiz yoxdu. Sadəcə, texniki məsələlərə görə bir ödəniş gecikmişdi, amma məsələ artıq həllini tapıb. Azarkeşlərimiz narahat olmasın".
Bəs, söhbət hansı futbolçudan gedir? Bu şəxs Alessio Kurçidi. "Ağ-qaralar" ötən il iyulun 30-da Belçikanın 2-ci liqa klubu olan “Frank Borains”dən aldığı oyunçu üçün tələb olunan məbləği - bəzi mənbələrə görə, transfer haqqı 200 min avro olub - vaxtında ödəməyib. Belədə sözügedən klub "Neftçi"dən FİFA-ya şikayət edib.
Xatırladaq ki, bakılılar lüksemburqlu hücumçu ilə 3 illik müqavilə imzalayıb. 24 yaşlı futbolçunun "transfermarkt"dakı dəyəri 300 min avrodu.
KƏNAN BAHADIR
Digər xəbərlər
