Mayın 13-də ölkə kubokunun final oyunu keçiriləcək. Təbii ki, “Sabah” – “Zirə” oyununun nəticəsini “Qarabağ” və “Neftçi” azarkeşləri də səbirsizliklə gözləyir. Bu məqam öz yerində. “Football-plus.az” xəbər verir ki, PFL-in saytı indiyəqədərki finallarda azarkeş sayı ilə bağlı maraqlı statistika açıqlayıb.
“Sabah” – “Zirə” oyunu kubok tarixində 32-ci final olacaq. Baxmayaraq ki, 34-cü kubok mövsümü başa çatmaqdadı.
Bunadək 2001/02 və 2019/20 mövsümləri başa çatdırılmayıb. Baş tutan 31 finaldan biri – 2020/21 mövsümünün matçı koronavirus pandemiyası üzündən tamaşaçısız keçirilib.
30 finalı ümumilikdə 300 minə yaxın – 289 min 463 seyrçi izləyib. Hər oyun üçün orta göstəricisi 9649-a bərabərdi.
2009/10 mövsümünün finalını rekord sayda - 26000 tamaşaçı seyr edib. “Bakı” və “Xəzər Lənkəran” arasında keçirilən görüş, ümumiyyətlə, ölkədaxili yarışlarda qeydə alınan ən yüksək göstəricidi. Deməli, final günü “Palms Sports Arena”nın tribunaları tam dolsa, 300 min zirvəsi fəth olunacaq!