“Sabah” Azərbaycan futbolu tarixinə adını 9-cu çempion kimi yazdırdı. Ötən mövsüm kuboku qazanan paytaxt təmsilçisi cari “futbol ili”ndə “Qarabağ”ı qabaqlayaraq sona 4 tur qalmış çempionluğu rəsmiləşdirdi. 

Mövsüm ərzində yalnız bir dəfə - 3-cü turda evdə “İmişli”yə uduzan komanda ardından heç bir matçda məğlub olmadı. Bəs yeni çempionu hansı klubar təbrik etdi? 11 klubdan hələ ki yalnız ikisi - “Qarabağ”la “İmişli” “bayquşlar”a gözaydınlığı verib. Başqa heç bir klubun nə saytında, nə də sosial şəbəkə hesabında təbrikə rast gəldik. 

Amma “Şamaxı”nı da unutmaq olmaz. “Şirlər” srağagünkü oyunda əvvəldən verdiyi vədə sadiq qalaraq çempion rəqibi üçün şərəf dəhlizi açıb. Centlmenliyi ilə seçilən klub ötən mövsüm “Qarabağ”a da eyni münasibəti göstərmişdi.

MÜZƏFFƏR QULUZADƏ