“Biz də ötən mövsümdəki nəticələrlə indikini müqayisə edirik və görürük ki, yayda qarşıya qoyduğumuz hədəflərdən uzaqlaşmışıq. Bu durum rəhbərlik tərəfindən kəskin etirazla qarşılanır. Futbolçuların keyfiyyətinə, peşəkarlığına heç vaxt şübhə etməmişik. İndi də düşünürük ki, yetərincə yaxşı futbolçularımız var. Amma təəssüf ki, onlar qarşıya qoyulan hədəfləri yerinə yetirə bilmədi. Siz də bilirsiz ki, avrokubok şanslarımız minimuma enib. Bu nəticələrdən rəhbərlik qəti şəkildə narazıdı. Bu mövqe futbolçuların özünə də dəfələrlə çatdırılıb. Biz rəhbərlik olaraq, əlimizdən gələni etdik ki, komanda düşdüyü böhrandan azad olsun. Heyif ki, meydançaya çıxan futbolçular bu uğursuzluq zolağından çıxa bilmirlər. Bu məsələyə hansı aspektdən yanaşmaq, həll etmək lazım olduğunu deyə bilmərəm. Bir şey bilirəm ki, yayda gətirdiyimiz futbolçular gözləntilərin tam əksinə çıxış etdilər. Oyunla bağlı, meydançadakı detallar haqda çox danışmaq istəmirəm. Bu haqda, hər halda, məşqçi oyunsonrası mətbuat konfranslarında mövqeyini bildirir, aydınlıq gətirir. Onu deyə bilərəm ki, bu nəticələrdən qəti narazıyıq. Futbolçuları yaxşı nəticədən sonra mükafatlandırdığımız kimi, uğursuz nəticələrdən sonra da mövsümün sonunda izahat soruşulacaq. Buna uyğun müvafiq addımlar da atılacaq”.