30-cu turun mərkəzi oyununda “Qarabağ” “Turan Tovuz”u qəbul etdi.

Diqqət mərkəzində olan adamlardan biri Musa Qurbanlı idi. Son vaxtlar oğluna daha çox etimad göstərən baş məşqçi Qurban Qurbanov bu dəfə də gənc hücumçuya əsas heyətdə şans verdi. Bu, təsadüfi qərar deyildi. Çünki Musa uzun müddət komandada legioner futbolçuların çoxluğu üzündən potensialını tam şəkildə göstərmək imkanı qazanmayıb. Halbuki onun potensialı var, texniki bacarığı və meydandakı hərəkətliliyi yetərincə yüksək səviyyədədi.

Musa meydanda olduğu müddətdə fəal idi - daim hücumlarda iştirak edir, top uğrunda mübarizədən çəkinmir, komandaya faydalı olmağa çalışırdı. Musanın oyunçu keyfiyyətləri, sadəcə, qol vurmaqla məhdudlaşmır. O, komanda oyununa töhfə verən, pressinq edən və rəqib müdafiəsini daim gərginlikdə saxlayan futbolçudu. Bu xüsusiyyətlər Musanı digər hücumçulardan fərqləndirir və xüsusi edir.

Təəssüf ki, futbolun gözlənilməz üzü də var. Oyunun gedişində Musa üçün növbəti uğursuzluq yaşandı - zədə alaraq meydanı tərk etməli oldu. Bu, həm komanda, həm də azarkeşlər üçün məyusedici an idi. Çünki son vaxtlar özünüsübut şansı qazanan bir futbolçu yenidən bəxtsizliklə üzləşdi.

Onun zədəsinin nə dərəcədə ciddi olduğu hələ ki məlum deyil. Amma Musa Qurbanlı kimi istedadlı və zəhmətkeş futbolçunun ardıcıl belə problemlərlə qarşılaşması düşündürücüdü. Sanki onun karyerasında ən böyük rəqib meydandakı müdafiəçilər yox, məhz şanssızlıqlardı.

Azərbaycan futbolunun belə oyunçulara ehtiyacı var. Musa istedadı, əzmkarlığı və oyunçu keyfiyyətləri ilə böyük karyera qura bilər. Sadəcə, görünən odu ki, onun yolu hamar deyil, çans heç üzünə gülmür.

İSRAYIL XEYRULLAYEV