Bilindiyi kimi, bu gün Misli premyer-liqasında 21-ci turdan təxirə salınan Azərbaycan derbisi keçiriləcək. "Qarabağ" ikinci sıradakı mövqeyini möhkəmləndirməyə, "Neftçi" avrokuboklara vəsiqə qazanmaq şansını artırmağa çalışacaq.

Matçın baş hakimi Kamranbəy Rəhimovdu. Bəs, ədalət təmsilçisi hansı komanda üçün daha düşərlidi?

"Football-plus.az" bu suala cavab axtardı. Bəlli oldu ki, Rəhimov cari mövsümdə "Neftçi"nin 2, "Qarabağ"ın 3 görüşünü idarə edib. Həmin oyunlar aşağıdakılardı:

ölkə kuboku, 1/4 final, ilk oyun
Şamaxı - Qarabağ 2:1

premyer-liqa
6-cı tur: Neftçi - Karvan-Yevlax 0:0
13-cü tur: Qarabağ - Karvan-Yevlax 2:0
22-ci tur: Şamaxı - Neftçi 2:2
26-cı tur: Qarabağ - Karvan-Yevlax 7:0

Göründüyü kimi, "ağ-qaralar" Kamranbəy Rəhimovun idarə etdiyi qarşılaşmalarda ancaq "sülh"ə razı olub. Bir oyunda uduzan "köhlən atlar" isə iki qələbə qazanıb. Təbii ki, belədə "fit sahibi"nin "Qarabağ" üçün daha düşərli olduğunu deyə bilərik. Görəsən, "Neftçi" bu mifi dağıda biləcəkmi?

Xatırladaq ki, saat 20.00-da başlayacaq oyun "Palms Sports Arena"da keçiriləcək.

KƏNAN BAHADIR