Martın 9-da ''Kayserispor''a qarşı oyunda zədələnən və o vaxtdan bu yana meydana çıxmayan ''Trabzonspor''lu Arseni Bataqov ilə bağlı yeni xəbər var.

"Football-plus.az" xəbər verir ki, ''A Spor'' kanalının məlumatına görə ukraynalı mərkəz müdafiəçisi bu mövsüm bir daha komandasına kömək edə bilməyəcək. Onun əməliyyat olunmasına qərar verilib.

Bataqovun dizindəki zədə gec sağaldığından həkimlər bu cür qərar verməli olublar. Baş məşqçi Fatih Təkkə ''Samsunspor'' ilə kubok matçından öncə verdiyi açıqlamada Bataqov ilə Okay Yokuşlunun mövsümün sonuna qədər sıradan çıxdıqlarını təsdiqlədi. Zədələndikdən bu yana 6 rəsmi oyun qaçıran gənc müdafiəçi bu mövsüm 30 rəsmi oyunda iştirak edərək 1 qol, 3 məhsuldar ötürmə ilə fərqlənib.

''Trabzonspor'' transfer planında da müəyyən dəyişikliklər etməli olacaq. Çünki klub bu yay istedadlı futbolçunun satışından ciddi gəlir əldə etməyi planlaşdırırdı. ''Benfika'' başda olmaqla Avropanın bir çox önəmli klubu Bataqov ilə yaxından maraqlanırdı.