''Trabzonspor''la bağlı maraqlı transfer iddiası ortaya atılıb. Qaradənizlilər tanınmış ukraynalı yarımmüdafiəçi Ruslan Malinovskini heyətə qatmağa yaxındılar. Özü də pulsuz. Bu iddianı tanınmış italiyalı insayder Fabritsio Romano paylaşıb. Xəbərdə qeyd olunub ki, Malinovskinin ''Cenoa'' ilə müqavilə müddəti mövsümün sonunda bitəcək. ''Trabzonspor'' 32 yaşlı futbolçuya üçillik müqavilə təklif edib. Tərəflər arasında artıq ilkin anlaşma əldə olunub. Futbolçunun meneceri ilə klub rəsmiləri qarşıdakı günlərdə transferi tamamlamaq üçün yenidən bir araya gələcəklər. ''Şaxtyor''un yetirməsi olan və daha öncə ''Genk'', ''Atalanta'', ''Marsel''də çıxış edən Malinovski 2024-dən ''Cenoa''nın şərəfini qoruyur. Ukrayna yığmasının üzvü bu mövsüm 31 rəsmi oyunda aktivinə 6 qol, 3 məhsuldar ötürmə yazıb. ''Trabzonspor'' son vaxtlar ukraynalı futbolçuların ən çox maraq göstərdiyi klubların başında gəlir. Hazırda bu klubda bu ölkədən iki futbolçu - Arseni Bataqov ilə Aleksandr Zubkov çıxış edir. Digər ukraynalı Danilo Sikan isə yanvarda ''Trabzonspor''dan ''Anderlext''ə yollanıb.