''Fənərbaxça'' mövsümün sonuna yaxın zəif nəticələrlə fanatlarını üzməkdə davam edir.

İstanbul nəhəngi Türkiyə kubokunun 1/4 finalında səfərdə ''Konyaspor'' ilə qarşılaşdı. ''Fənər''in işinin asan olmayacağı bəlli idi. Son 5 turun 4-də qələbə qazanan Konya təmsilçisi yaxşı formada idi. Bu komanda fevralın ortalarında superliqada ''Qalatasaray''ı da evə əliboş yola salmışdı (2:0).

Əsas vaxtı qolsuz başa çatan görüş penaltilər seriyasına doğru gedirdi. ''Sarı-lacivərdlilər''in çox tənqid olunan forvardı Sidiki Şerif meydanda olduğu 56 dəqiqə ərzində yenə heç nə ilə yadda qalmadı. Matçın həlledici anı əlavə vaxtın son anlarında yaşandı. Semedonun rəqib oyunçuya qarşı kobudluğundan sonra VAR işə qarışdı. Hakim epizodu monitordan izlədikdən sonra penalti təyin etdi və Yevtoviç 120+2-ci dəqiqədə fürsəti boşa vermədi.

Beləliklə, ''Konyaspor'' böyük sürprizə imza ataraq ölkə kubokunda ilk yarımfinalçı oldu. Bu mərhələnin digər oyunları bu gün və sabah keçiriləcək.

''Fənərbaxça'' 4 gün ərzində ikinci ağır zərbəni aldı. Domeniko Tedeskonun kollektivi şənbə günü superliqada evdə ''Çaykur Rizəspor''la oyunda (2:2) da qızıla bərabər xallar itirmişdi.

Maraqlıdı ki, ''Konyaspor'' tarixində ikinci dəfə ''Fənər''i kubokda mübarizədən kənarlaşdırdı. 2002/03-ün 1/16 finalında da Konya təmsilçisi evdə güclü rəqibini minimal hesabla üstələmişdi.