Türkiyə çempionatında məhsuldarlığı ilə diqqət çəkən ''İstanbul BŞ''nin üzvü Eldor Şomurodov ilə bağlı yeni xəbər var. Başakşəhərlilərin mövsümün əvvəlində ''Roma''dan icarəyə götürdüyü özbəkistanlı futbolçu artıq daimi əsasda bu kluba məxsus olacaq. İtaliya mətbuatının yazdığına inansaq, iki klub arasında xüsusi anlaşmaya görə ''İstanbul BŞ'' elitada qalmağı rəsmiləşdirəcəyi təqdirdə Şomurodov daimi əsasda Türkiyə klubuna transfer olunmalıdı. Bunun üçün ''İstanbul BŞ'' ''Roma''ya daha 2,8 milyon avro ödəyəcək. Şomurodovun sonrakı satışından 10 faiz pay da italyanlara çatacaq. Xatırladaq ki, mövsümün əvvəlində ''İstanbul BŞ'' həm də 3 milyon avro icarə haqqı ödəmişdi. 30 yaşlı Şomurodov hazırda 18 qolla Türkiyə çempionatında bombardirlər yarışında 2-ci pillədə qərarlaşıb. Təcrübəli futbolçu bu mövsüm 40 rəsmi oyunda aktivinə 19 qol, 5 məhsuldar ötürmə yazıb.