“Zirə” ölkə kubokunun yarımfinalının cavab oyununda “Turan Tovuz”la 0:0 etməklə finala adladı. “Football-plus.az” “Zirə”nin baş məşqçisi Rəşad Sadıqovun mətbuat konfransından hesabatı təqdim edir.
- Olduqca stressli oyun keçdi. Ən gərgin oyunumuzu keçirdik. 65-ci dəqiqəyə qədər bərabər səviyyəli oyun keçdi. Sonra rəqib təzyiqi artırdı, biz də hesaba görə müdafiəyə çəkildik. Futbolçularımı təbrik edirəm.
- İlk oyundakı hakim qərarları komandada təzyiq yaratmışdı?
- Təbii olaraq basqı var idi. Bəzən başa düşürük ki, gərgin mübarizə gedir. Hakim və rəqib komandalar üçün təzyiqlər olurdu. Bizə də penalti kimi gəlir. 3-4 tur əvvəl eyni epizodda Yevıaxda deyilmişdi ki, penalti deyil. Futbolçularımla, hakimlərlə kommunikasiyada oluram. Eyni epizodlara fərqli qərarlar olur. Bizim də beynimiz qarışır. 50/50-lik epizodlar çox olur. Hər iki komanda finala layiq idi.
- Finalda “Sabah”la oynamaq istəyərsiz, yoxsa “Qarabağ”la?
- Elə rəqiblərdi ki, onları özümə arzulamaq istəmərsən. Birinin titul təcrübəsi böyükdü. Ötən mövsüm “Sabah” kubok qazanıb. Hər ikisi iddialıdı.
- “Turan Tovuz”un prezidenti Ehtiram Quliyevin açıqlaması sizı necə təsir etdi?
- Məyus etdi. Məsələ hakimi tənqid etmək deyil. Mən olsam, mən də edərdim. Amma bəzi açıqlamalar məyusedicidi.
- “Turan Tovuz” azarkeşləri hələ də sizə təxribat edir. Niyə?
- Doğma evimə - Tovuza gedirəm. Mənə orda 3 ay futbol oynamağa icazə verilməmişdi. Fuad məni “Şəfa”da oynamağa məcbur edirdi. Sonra “Neftçi”yə transfer olunmuşdum. O komanda, şəhər mənə doğmadı. “Şamaxı” - “Turan Tovuz oyununu canlı izləyirdim. Rəqibi təhlil etməyə getmişdim. Mən Tovuza tez-tez gedirəm. Orda dostlarım da var. Elə bilirlər ki, tovuzluyam. Baxımlı oyunları stadiondan izləyirəm. Kiməsə tərəfdarlıq etmək məndə heç vaxt olmayıb. Haqqımı halal edirəm. Yəqin ki, anlaşılma olar. Açıqlamanı məsələ səngisin deyə vermirəm. Onları həmişə diqqətdə saxlamışıq.
- “Qarabağ”da yorğunluq var. Uzun illər o komandanın içində olmusuz. “Qarabağ”la finalda oynamaq istərdiz?
- Qəti. O səbəbdən istəmirəm. Finalda yorğun, motivasiyasız komanda olmayacaq. Hazırda rəqib seçmirəm.
- Yerli futbolçular sanki hələ də ulduz xəstəliyinə tutulur.
- Çıxış yolu nədi, bilmirəm. Vaxtilə məndə də belə xətalar olub. Daha çox çalışa bilərdim. Onların böyük bacarığı var. ÇL-də oyunun ən yaxşısı seçilmək elə-belə şey deyil.
- Xeyrinizə verilən yanlış hakim qərarları sizi narahat etmir? İctimaiyyətdə də komanda haqda mənfi fikirlər formalaşdırır.
- Əsas etiraz “Turan Tovuz”la kubok oyununda oldu. Bir də “Neftçi” matçında. Hər üç epizod mübahisəyə açıq epizoddu. Oyundan sonra bir dəfə baxdım, elə bildim ki, ofsayd deyil. Amma sonra təkrara baxanda top qapıya gedərkən Ruana görə Piriç topu itirir. Biz də ofsayd olduğunu düşünürük. Belə qərarlar məni sevindirmir. Bundan əziyyət çəkən komanda biz olmuşuq. Uzun illər hakimlikdən çox əziyyət çəkmişik. 40-50 epizod paylaşaram ki, nəticəyə təsiri olub və mövsümün sonuda avrokuboklardan uzaq qalmışdıq. Səhv olub, etiraf edirəm. Xeyrimizə və zərərimizə olan səhvləri saysaq, uçurum olar. İstəmirəm ki, oyunumuzda səhvlər olsun. Özüm üçün də biləndə ofsayddı, oyunun nəticəsinə görə 3-4 gün məyus olmuşdum.
MÜZƏFFƏR QULUZADƏ