Ölkədaxili turnirlərdə gərginlik bir qədər artan, avrokuboklara vəsiqə uğrunda mübarizə qızışan kimi aydın oldu ki, Azərbaycan hakimləri belə ağır sınaqlara hazır deyil. Yuri Vernidublu “Neftçi”nin fenomenal yüksəlişi olmasaydı, bəlkə də hər şey qaydasında gedəcəkdi, turnir cədvəlinin ilk 4 pilləsində qərarlaşan və kubokda yarımfinala qalan eyni komandalar vəsiqələrin sahiblərini müəyyənləşdirəcəkdi. Amma...

Amması odu ki, artıq hər turda ciddi səhvlər sıralanır, qalmaqal dizə çıxır, Hakimlər Komitəsinin sədri Rəhim Həsənov səhvləri etiraf etməkdən bezib. Hakimlər qeyri-adi gərginlik keçirir, panika içindədilər, sanki onlara nəsə olub. Bunu artıq Qurban Qurbanov da vurğulayıb, Fariz Yusifov da. Eyni zamanda, ölkənin tanınan hakimlərindən bir neçəsi son günlər cəzalanıb, oyunların idarəçiliyinə cəlb olunmur və bu siyahı genişlənməkdədi. Futbol mövsümünün sonuna isə az qalır. Bizi irəlidə 5 tur, kubokun iki yarımfinal oyunu və final gözləyir. Bəs mövsümü xilas etmək, qansız-qadasız başa vurmaq üçün nə etmək olar?

1. Cəza müddətini bitirmək üzrə olan, eləcə də Hakimlər Komitəsinin cari mövsümdəki son 34 oyuna təyin etmək istədiyi bütün qalan hakimlər qapalı məkana salınmalı, onların ətraf aləm, xüsusən futbol ictimaiyyəti ilə ünsiyyətinə son qoyulmalı, yalnız gündə bir dəfə ailə üzvləri ilə telefon əlaqəsinə şərait yaradılmalıdı. Yeri gəlmişkən, Azərbaycan futbolunda vaxtilə belə təcrübə olub.

2. Hakimlərin ciddi psixoloji yardıma ehtiyacı var. Bu üzdən ölkənin tanınan psixoloqlarından biri bu işə cəlb olunmalı, hakimlərə özünəinam, qətiyyət aşılamaq üçün təlimlər keçməlidi.

3. Veteran hakimlər həmin qapalı məkana baş çəkərək indikilərə Azərbaycan hakimlik məktəbinin uğurları, şanlı keçmişi, cari mövsümü xilas etməyin vacibliyi haqda mühazirələr oxumalıdı.

4. Kubokun finalı Azərbaycanın avrokuboklardakı 4-cü təmsilçisini müəyyənləşdirmək baxımından əlahiddə dərəcədə önəmli olarsa, bütün söz-söhbətə son qoymaq üçün idarəçilik əcnəbi hakimlər briqadasına tapşırılmalıdı. Mən də naturaca mühafizəkaram, bu məsələyə hakimlik məktəbimizin keçmiş şöhrəti üzərindən, “hamı yerli mal alsın, xeyir vətənə qalsın” prinsipi ilə yanaşan futbol ictimaiyyətinin nümayəndələrini də anlayıram. Amma bəzən elə olur ki, bıçaq sümüyə dirənir, qaradan artıq rəng olmur. Azərbaycan hakimliyi ətrafında indi elə durum yaranıb ki, bundan sonrakı mərhələ uçurumdu. Əliyar Ağayevin inanılmaz biabırçı idarəçiliyinə görə Ehtiram Quliyevin səsləndirdiyi ifadələrin ölkə futbolunu necə silkələdiyini hamı gördü. Sonra FİFA referilərindən Elçin Məsiyevlə Kamal Umudlu da kobud səhvə yol verdi. Sonra İnqilab Məmmədovun Zirədəki kobud səhvi “Neftçi”nin 4-cü pilləyə yüksəlməsinə imkan vermədi. Niyə etiraf etmirik ki, bu gün futbol hakimlərimiz arasında xarizmatik, bütün çətinliklərin öhdəsindən gələ biləcək biri yoxdu? Bəli, yoxdu, etiraf edək, yüngülləşək, mənəvi rahatlıq tapaq.

...Edək, nəsə edək ki, rəqabətin artdığı, çoxlu maraqlı oyun izlədiyimiz, yeni çempion görəcəyimiz mövsüm qanqaraldıcı, biabırçı sonluqla bitməsin!

HUŞƏNG