Ölkə çempionatının 27-ci turunda ilk iki pillədə qərarlaşan “Qarabağ” və “Sabah” xal itirdi. Ağdamlılar “Şamaxı” səfərindən, “bayquşlar” isə “Zirə” ilə oyundan 1 xalla ayrıldı. Düzdü, “Sabah”ın iddialı “Zirə”ni məğlub edə bilməməsi faciə sayılmır. Amma Valdas Dambrauskasın komandasının əvvəlki dövrələrdə “qartallar” üzərində rahatlıqla qələbə qazanması bu oyunda da eyni ssenari ilə bağlı gözləntilər yaratmışdı. 

Amma Şamaxı səfəri nə qədər çətin olsa da, “Qarabağ”ın ordan qələbə ilə ayrıla bilməməsi faciədi. “Sabah”la xal fərqi 8-ə enə bilərdi. Amma bu ssenari reallaşmadı. Qurban Qurbanov da son mətbuat konfranslarında çempionluq mübarizəsində olduqlarını bildirsə də, çempionluğu artıq məcburiyyət kimi qəbul etmir.

Qarşıda 6 tur var, xal fərqi isə 10-a bərabərdi. Ağdamlılar “bayquşlar”dan bir oyun az keçirib. O matç da qışdan sonra ən çox xal toplayan 2-ci komandaya - “Neftçi”yə qarşı olacaq. Ağdamlıları flaqmanla ardıcıl iki oyun gözləyir. Heç kim “köhlən atlar”ın bu qarşılaşmalardan 6 xalla ayrılacağına zəmanət verə bilməz. Hazırkı “Qarabağ”ın bu durumda olan “Neftçi”dən 4 xal alması belə uğur sayılmalıdı.

Bəs bundan sonra “Qarabağ”ın çempionluq şansı nə qədərdi? Mənə elə gəlir ki, hədsiz az. Son illərdə heç olmadığı qədər az. Ağdamlıların təqviminə nəzər salaq.

“Sabah” (ev) 
“Neftçi”, “Neftçi” (hər ikisi səfər) 
“Turan Tovuz” (ev) 
“Qəbələ” (səfər) 
“İmişli” (ev) 
“Sumqayıt” (səfər) 
“Sabah”ın təqvimi: 
“Qarabağ” (səfər) 
“Karvan-Yevlax” (ev) 
“Şamaxı” (səfər) 
“Kəpəz” (ev) 
“Neftçi” (ev) 
“Turan Tovuz” (səfər) 

Hər iki komanda üçün çətin rəqiblər var. Amma “Qarabağ” üçün üzücü məqam ardıcıl üç ağır oyun keçirmək reallığıdı. Bərpa üçün vaxt da az olacaq. “Sabah”da isə bu mənada vəziyyət yaxşıdı.

“Qarabağ”dan başqa digər iddialılarla son iki turda oynayacaq. Masazırlıların həmin oyunlara qədər çempionluğu rəsmiləşdirməsi real görünür. 

Tədricən bütün suallara aydınlıq gəlir. Əsas mübarizə 4-cü və 10-cu yerlər uğrundadı. Hərçənd “Zirə” kuboku qazanacağı təqdirdə 4-cü yeri tutmağın da heç bir əhəmiyyəti olmayacaq.

MÜZƏFFƏR QULUZADƏ