Mövsümə fırtına kimi başlayan, sabit şəkildə də davam edən “Sabah”ın Misli premyer-liqasının 2025/26 mövsümündə çempionluğuna yanlız möcüzə mane ola bilər. “Bayquşlar” bir oyun az keçirən “Qarabağ”ı 10 xal qabaqlayır. Ağdamlıların təxirə salınan oyunu da “Neftçi”yə qarşıdı və aprelin 30-da olacaq.

Mövsümün sonuna 8 tur qalıb. 26-cı turun aprelin 6-da keçiriləcək oyununda “Qarabağ” “Karvan-Yevlax”ı məğlub edir, “Sabah” “Araz-Naxçıvan”la oyunda 2 xal itirir. Belədə avtomatik “bayquşlar”la “köhlən atlar” arasındakı xal fərqi 8-ə enir.

27-ci turda liderlər eyni gündə - aprelin 11-də meydana çıxacaq. Mənim proqnozum belədi: “Qarabağ” heç bir motivasiyası, hədəfi qalmayan “Şamaxı”nı səfərdə məğlub edir, “Sabah” “Zirə” ilə ev oyununda xal itirir. Liderlər arasındakı xal fərqi bir qədər də azalır – 6 olur.

28-ci tur... Aprelin 18-i, saat 19.30... Bax, əsl həqiqət anı budu! “Qarabağ” “Bəhramov”da “Sabah”ı məğlub edib, xal fərqini 3-ə endirərsə, mübarizə alovlanacaq. Yox, “Sabah” meydandan qalib ayrılarsa, artıq heç bir komanda, güc, qüvvə onun çempionluq yoluna daş qoya bilməyəcək

“Qarabağ” aprelin 18-də xal fərqini 3-ə endirsə, 29-cu turun oyunlarının önəmi ikiqat artır. Düzdü, “bayquşlar” həmin turda, aprelin 27-də aşkar autsayder “Karvan-Yevlax”ı qəbul edəcək, yəni onların 3 xal qazanması çətin olmayacaq. Ağdamlılar isə bir gün əvvəl “Neftçi” ilə çətin səfər oyununa çıxacaq.

Mənə elə gəlir ki, çempionluğun taleyinə böyük ölçüdə məhz 29-cu turda aydınlıq gələcək. Dərin intriqa həvəskarları mübarizənin mayın sonuna qədər davam edəcəyini deyir. Açığı, bu variant mənə o qədər də inandırıcı görünmür. Azərbaycanı 70 il geri salan inqilab apreldə baş vermişdi. Elə futbol inqilabının da – “Sabah”ın mümkün ilk çempionluğunu, ölkə futbol tarixinə adını 9-cu çempion kimi yazdırmasını nəzərdə tuturam – apreldə gerçəkləşməsi tam realdı.

MÜZƏFFƏR QULUZADƏ