Misli premyer-liqasında 7-cı turla bağlı bir çox maraqlı məqamlar var.

Darmadağınla bitən Azərbaycan derbisi, “Kəpəz”in məğlubiyyət seriyasının davam etməsi, “Turan Tovuz”un daha bir seriyasının qırılması, “Sumqayıt”ın böhrandan çıxa bilməməsi, “Səbail”lə “Sabah”ın elə ilk yarıda 5 qol vurması və s. və i.a.

Turun Tovuzda keçirilən açılış oyunu “Kəpəz”in azarkeşlərinin növbəti sarsıntısına səbəb oldu. Azər Bağırov da bu komandanın məğlubiyyət seriyasına son qoya bilmədi. Belədə “Şamaxı”ya uduzmağı həzm edə bilməyən gəncləri azarkeşlərin “istefa” şüarına güc verməsi təbiidi. Sadəcə, daha bir istefa vəziyyəti düzəldəcəkmi? – bax, əsas sual budu.

Bu ritorik sualı “Neftçi”yə da aid etmək olar. Cümə gününün digər oyununda “Qarabağ” önündə darmadağın olan “ağ-qaralar” üçün işıq ucu görünmür. Bu gedişlə Roman Qriqorçukun də postundan ayrılması təəccüb doğurmayacaq. “Qarabağ” isə çətin London səfəri ərəfəsində gücünü göstərdi və zirvəyə qayıtdı.

Düzdü, “Turan Tovuz”un ertəsi ağdamlıları ordan uzaqlaşdırmaq imkanı var idi. Sadəcə, bunun üçün “Araz-Naxçıvan”ı məğlub etmək lazım gəlirdi. Ötən tur “beton” müdafiəsi yarılan Kurban Berdıyev Azərbaycanda ilk dəfə məğlubiyyət acısı yaşadı. Türkmənistanlı məşqçi bu nəticəni Elçin Məsiyevin “boynuna yükləyə” bilərdi, amma belə etmədi və azarkeşlərin gözündə bir qədər də ucaldı.

Avrokuboklardan biabırçı şəkildə uzaqlaşan “Sabah” artıq bütün diqqətini çempionata yönəldib. Odu ki, daha səviyyəli futbolçulardan qurulan “bayquşlar”ın bazar günü “Səbail”i məğlub etməsini adi nəticə kimi qarşılamağa məcburuq. Şahin Diniyev hələ də komanda formalaşdırır, belədə isə xallar yavaş-yavaş əldən çıxır, deməli, həm də “dənizçilər”in autsayder statusu qətiləşir.

Nə qədər gözlənilməz olsa da, artıq “Sumqayıt” da həmin statusu daşıyır. “Fehervar” Samir Abasova və komandasına necə zərbə vurubsa, artıq mikromühit də bozulub. Çoxdan media önündə ürəyini aça bilməyən baş məşqçi, nəhayət, danışdı və oxları futbolçularına yönəltdi. Daha bir-iki uğursuz oyundan sonra Abasovu da istefa verən baş məşqçilər sırasında görə bilərik. “Zirə” “Sumqayıt”dan fərqli daha tez özünə gəldi. Başqaları xal itirməkdəykən Rəşad Sadıqovun “qartallar”ı asta-asta zirvəyə doğru uçur. Bir sözlə, çempionat sürət yığmaqdadı. Düzdü, qəribə nəticələr, komandaların fəaliyyətində xaotiklik çoxdu. Amma bunun özündə də bir gözəllik var.

Misli premyer liqası
1-ci dövrə, 7-ci tur
20 sentyabr
Kəpəz – Şamaxı 0:2
Qarabağ – Neftçi 4:0
21 sentyabr
Turan Tovuz – Araz-Naxçıvan 1:2
22 sentyabr
Səbail – Sabah 2:4
Sumqayıt – Zirə 0:2

1. Qarabağ 6 5 0 1 16-4 15
2. Sabah 7 4 2 1 16-11 14
3. Turan Tovuz 7 4 2 1 9-4 14
4. Araz-Naxçıvan 6 4 1 1 7-6 13
5. Zirə 6 4 0 2 11-5 12
6. Şamaxı 6 3 2 1 6-3 11
7. Sumqayıt 7 2 0 5 5-9 6
8. Səbail 7 1 1 5 10-14 4
9. Neftçi 7 0 4 3 2-10 4
10. Kəpəz 7 0 0 7 2-18 0

Bombardirlər: Cesse Sekidika (Sabah) - 5 , Coy-Lens Mikels (Sabah), Rafael Utziq (Zirə) – 4.

Növbəti turun proqramı:
27 sentyabr, 19:00. Araz-Naxçıvan – Səbail
28 sentyabr, 17:00. Zirə - Kəpəz
28 sentyabr, 19:30. Neftçi – Sumqayıt
29 sentyabr, Şamaxı – Turan Tovuz
29 sentyabr, 19:00. Qarabağ – Sabah

ƏSƏD SEYİDOV