Argentinalı əfsanə Çalhanoğlunu təriflədi
Hazırda Argentina təmsilçisi “Estudiantes”in prezidenti vəzifəsini icra edən Xuan Sebastyan Veron türkiyəli ulduz Hakan Çalhanoğlu və onun A seriyasının son turunda “Roma”nın qapısına vurduğu mükəmməl qol barədə açıqlamalar verib.
"Football-plus.az" xəbər verir ki, 1990-cı illərin sonlarında, 2000-ci illərin əvvəllərində dünya futbolunun mühüm simalarından olan argentinalı əfsanə özü də vaxtilə (2004-06) “İnter”də top qovub. 51 yaşlı Veron bunları deyib:
“Hakan Çalhanoğlunun qol vurduğu epizodda məni ən çox təəccübləndirən ətrafında heç kimin olmaması oldu. Heç kim ona bu zərbəni vurmaq üçün mane olmadı. Topu qəbul etmək və başını qaldırıb “çərçivə”ni nişan almaq üçün yetərincə zamanı oldu. Zərbə vurarkən fiziki gücündən düzgün istifadə etdi. Ən əsası zərbə anında koordinasiyasını itirmədi. Halbuki bir çoxları bu səhvə yol verir. Onun topu istədiyi nöqtəyə göndərə bilmək bacarığını çox bəyənirəm. İstedadı təkcə bununla ölçülmür. Eyni zamanda mükəmməl bir oyun qurucusudu. Topu özündə gözəl saxlayır. Komandanın tempini müəyyənləşdirir. Oyunu nə vaxt yavaşıtmaq, nə vaxt sürətləndirmək lazım olduğunu gözəl bilir. Rəqib müdafiəsini yarmağı bacarır. Boş mövqedə olan komanda yoldaşına mükəmməl uzun ötürmə vermək qabiliyyətinə malikdi. Fikrimcə, Çalhanoğlu “İnter” üçün çox böyük bir dəyərdi”.
Bu mövsüm “İnter”lə karyerasının ikinci A seriyası çempionluğunu qazanmağa yaxın olan Hakan Çalhanoğlunun klubdakı gələcəyi hələ də böyük sual altındadı. 27 rəsmi oyunda hesabına 10 qol, 5 məhsuldar ötürmə yazan, karyerasının ən yaxşı mövsümlərindən birini keçirən 32 yaşlı futbolçunun Milan nəhəngi ilə hələ birillik müqaviləsi var. “Qalatasaray” ona uzun müddətdi maraq göstərir. Amma İstanbul nəhənginin rəsmi təklifi olmayıb. Bu yay “İnter” təcrübəli futbolçusu ilə bağlı qərar verməli olacaq. Hakan ya böyük simpatiya bəslədiyi “Qalatasaray”a yollanacaq, ya da “neradzurra” ilə yeni müqavilə imzalayacaq. Əks təqdirdə “İnter” onu gələn yay pulsuz əldən buraxmaq təhlükəsi ilə üzləşəcək.
Çalhanoğlunun yayda dünya çempionatında sərgiləyəcəyi performansdan da çox şey asılı olacaq. Amma İtaliya mənbələrinin yazdığına inansaq, onun taleyi daha çox baş məşqçi Kristian Kivudan asılıdı. “İnter” bu il çempion olsa, Kivu ilə yeni müqavilə imzalanacaq. Rumıniyalı mütəxəssis isə birmənalı şəkildə Hakanın komandada qalmasını istəyir. Belədə “İnter” rəhbərliyi ondan məvacibinin endirilməsini də tələb edə bilər.
Türkiyə yığmasının kapitanı hazırda “İnter”də ilə 6,5 milyon avro qazanır.
Digər xəbərlər
