Martın 31-də Priştinada keçiriləcək Kosovo - Türkiyə matçının hakimi bəlli olub.

Xatırladaq ki, bu duelin qalibi DÇ-2026-nın final mərhələsinə vəsiqə qazanacaq. Bu önəmli qarşılaşmaya İngiltərədən olan hakimlər briqadası təyinat alıb. Əsas hakim Maykl Oliver, onun köməkçiləri Stüart Bert, Ceyms Meynvarinq, 4-cü hakim isə Kris Kavana olacaq. 41 yaşlı Oliver uzun illərdi, Avropanın aparıcı ədalət təmsilçilərindən hesab olunur.

Düzdü, indiyə qədər ona yığma və ya klub səviyyəsində önəmli turnirlərdə final idarə etmək qismət olmayıb. Amma İngiltərə daxilindəki turnirlərdə dəfələrlə finallarda fit sahibi olub.

Maraqlıdı ki, onun idarəçiliyində Türkiyə son matçda rüsvay olmuşdu. ''Ay-ulduzlular'' DÇ-2026-nın seçmə mərhələsi çərçivəsində evdə İspaniyadan 6 cavabsız top buraxmışdı.

Ümumilikdə klub və yığma səviyyəsində Türkiyə təmsilçiləri indiyə qədər Maykl Oliverin idarə etdiyi 12 qarşılaşmadan 5 qələbə, 1 heç-heçə, 6 məğlubiyyətlə ayrılıb.