İstanbul Cümhuriyyət Prokurorluğunun məşhur şəxslərə qarşı narkotik maddələrin istifadəsi və satışı ilə bağlı əməliyyatı davam edir.

"Football-plus.az" xəbər verir ki, bu dəfə aparılan araşdırma çərçivəsində 16 nəfər saxlanılıb.

Ən maraqlısı odu ki, onların arasında ''Beşiktaş''ın sabiq prezidenti Fikrət Orman ilə ''Qalatasaray''ın sabiq prezidenti Burak Elmas da var! Onlardan başqa iş adamları Kərim Sabancı ilə Hakan Sabancı, aktrisa Hande Erçel, model Didem Soydan və aparıcı Quzide Duran da saxlanılıb. Onlar Narkotik Vasitələrə Qarşı Şöbə Müdürlüyünün əməkdaşları tərəfindən saxlanılıblar. Onların aqibətinə ifadə verdikdən sonra aydınlıq gələcək.

Xatırladaq ki, dekabrda ''Fənərbaxça''nın indiki prezidenti Sadəttin Saran da saxlanılmış və iki dəfə ifadə verməli olmuşdu. Hətta onun saçından götürülən analizin nəticəsi müsbət çıxmışdı. Amma kokaindən heç vaxt istifadə etmədiyini deyən və başqa ölkədə analiz verməyə hazır olduğunu vurğulayan Saran bir müddət sonra sərbəst buraxılmışdı.