''Yuventus''u mübarizədən kənarlaşdıran və Çempionlar Liqasında 2014-dən bu yana ilk dəfə 1/8 finala yüksələn ''Qalatasaray'' məlum olduğu kimi bu mərhələdə ''Liverpul'' ilə qarşılaşacaq.

Bu arada UEFA-nın Türkiyə çempionuna şok bir cəza verdiyi məlum olub. ''Cim-Bom'' İngiltərədəki cavab oyununda azarkeş dəstəyindən məhrum edilib!

UEFA-nın açıqlamasında ''Yuventus'' ilə matçda ''sarı-qırmızılar''ın fanatlarının tribunada yol verdikləri özbaşınalıqlar, petardların yandırılması və meydana yad cisimlərin atılması bu cəzanın əsas səbəbi kimi göstərilib. Ancaq ''Qalatasaray'' bu qərara etiraz edib və cəzanın təxirə salınmasını istəyib.

İstanbul nəhənginin etirazı qəbul edilsə, o zaman ''Enfild''dəki oyuna qonaq sektoruna da azarkeşlər buraxılacaq.

Qeyd edək ki, ilk qarşılaşma martın 10-da İstanbulda, cavab oyunu martın 18-də Liverpulda keçiriləcək.