“Qarabağ” – “Sabah” oyununa bilet satışı ilə bağlı elə durum yaranıb ki, açığı, biz də gerçəklə yalan arasındakı sərhədi müəyyənləşdirə bilmirik. Hər halda, bu gün stadionda anşlaq olması arzusuyla bildiklərimizi “Football-plus.az” oxucusuna çatdıracağıq.

“Qarabağ” cümə axşamı saat 18.00-da biletləri satışa çıxardı. Halbuki bunu bir-iki gün əvvəl də etmək olardı. Bu məqamla işimiz yoxdu, müstəqil klubdu, özü bilər... Satış elanında yalnız 10, 11, 12, 13, 16, 17, 18, 19-cu, eləcə də iki VİP sektora bilet satılacağı, minimum qiymətin 5 manat olacağı göstərildi. Halbuki biletin qiymətini 2-3 manat etməklə daha ciddi kütləviliyə nail olmaq mümkün idi. Bu məqamla da işimiz yoxdu, müstəqil klubdu, özü bilər.

“Qarabağ” bir neçə saat əvvəl 9500 biletin satıldığını elan etdi. 10 sektor üçün 11350 biletin satışa çıxarıldığını nəzərə alsaq, belə çıxır ki, hələ də 1850 bilet sahibini gözləyir. Digər tərəfdən, bizdə olan bilgiyə görə, “Sabah” azarkeşləri üçün ayrılan 2 min bilet də satılıb. Onda belə çıxır ki, 9500 bileti “Qarabağ”, 2000 bileti də “Sabah” azarkeşləri alıb? Və bu bilgi doğrudusa, onda belə çıxır ki, “Qarabağ” oyun saatına qədər yenidən satışa bilet çıxarmalı olacaq?

Sirr deyil ki, ölkəmizdə oyun günü daha çox bilet satılır. Xeyirlisi! Təki stadionda anşlaq olsun, ən azı 20 min azarkeş bu nəhəng oyunu izləsin. Amma bilet satışı ətrafında belə qeyri-müəyyən durum yaratmaq heç də yaxşı iş deyil.

HUŞƏNG