"Turan Tovuz" Misli premyer-liqasının təxirə salınmış 14-cü tur matçında "Qəbələ"yə qalib gəldi - 3:0.

"Football-plus.az" xəbər verir ki, "bozqurd"un baş məşqçisi Kurban Berdıyev oyunsonrası mətbuat konfransında jurnalistlərin suallarını cavabladı.

- "Qəbələ"dən bir az ehtiyat edirdik. Onların yaxşı komanda olduğunu bilirdik. Rəqibin sürətli hücumçuları var. İşimizin öhdəsindən gəldik. Uşaqlar pis oynamadılar.

- Demək olar ki, bu gün gözlədiyiniz "Qəbələ"ni görmədiz?
- Xeyr, necə rəqib gözləyirdiksə, onu da gördük. Birinci hissədə "Qəbələ"nin kifayət qədər qol epizodları oldu. Heç bir komanda üçün onlara qarşı oynamaq asan olmayıb.

- Sanki Rəhim Sadıqovun mövqeyini dəyişmisiz...
- Bəli, biz onunla danışdıq. Belə qərara gəldik ki, dayaq yarımmüdafiəçisi mövqeyində daha çox fayda verəcək.

- Mövsümün ilk yarısında bir çox mütəxəssislər "Turan Tovuz"un baxımsız futbol oynadığını bildirirdi. Son matçlarda isə komanda artıq 20 dəqiqəyə oyunun taleyini həll edir. Nələri dəyişdiz?
- Komanda zamanla formalaşır. Buna bir neçə il lazım olur. Hər mövsümün özünün vəzifələri var. Bu mövsümün vəzifələri ötən mövsümdən fərqlidi. Buna uyğun olaraq irəliyə doğru addımlayırıq. Bəzən nəsə alınır, bəzən alınmır. Amma uşaqlar hara getdiklərini bilirlər. Bir az vaxt lazımdı.

- Artıq "Zirə" ilə xal fərqi 5-ə yüksəldi. "Turan Tovuz"un avrokuboklar yolunda böyük addım atdığını demək olar?
- Xeyr, hələ deyə bilmərik. Ötən mövsüm bizə göstərdi ki, indidən nəsə demək tezdi. Hazırda Azərbaycan çempionatı o qədər rəqabətlidi ki, istənilən komanda digərindən xal ala bilər. Ötən mövsüm nəticələri hardasa əvvəlcədən demək olardı. Amma bu mövsüm gözlənilməz nəticələr qeydə alınır. Azərbaycan futbolu daha da güclü olub.