“Norveçli səyyah Tur Heyerdalın soydaşları - Espen Eskosun başçılıq etdiyi hakimlər briqadası haqda danışmazdan öncə qeyd edək ki, məşhur səyyah Azərbaycanda tədqiqatlar apararkən hesab edirdi ki, onun əcdadları bu torpaqlarda yaşayıblar. Bu məntiqlə çıxış etsək, "həmyerlilərimiz" heç də "Qarabağ"la insaflı davranmadılar. Matçın 1-ci hissəsi "köhlən atlar" üçün əsl kabus oldu. Rəqib sanki onlara nəfəs almağa imkan verməməyə söz vermişdi. Hakimliklə bağlı deməliyik ki, Eskos şimallılara xas üslubda - soyuqqanlıqla idarə etdi. 23-cü dəqiqədə Bikalyoya qarşı kobudluq oldu. VAR potensial qırmızı vərəqəyə işarə etdi. Amma yekunda heç sarı vərəqə də göstərilmədi. Matçın müzakirə olunan məqamı isə 28-ci dəqiqədə baş verdi. Qapımıza tərəf təxminən 13 metrdən zərbə endirildi. Mateus Silva bu epizodda yıxıldı və top onun dayaq əlinə dəydi. Əslində isə burda Mateus oyunçuya verilən üstünlükdən sui-istifadə etdi. Bu nə deməkdi? Beynəlxalq Futbol Assosiasiyaları Şurasının təlimatına görə, oyunçu yerə yıxılarkən və “sürüşmə” fəndi edərkən bədən müvazinətini qorumaq üçün əlini yerə qoyursa, bu dayaq əli hesab olunur. Bu vəziyyətdə top ələ dəyirsə, o zaman bu qayda pozuntusu sayılmamalıdı. Bu epizodda isə hakimlər müəyyən etdilər ki, əslində Mateusun məqsədi topu əllə saxlamaq və bunun üçün dayaq əlindən istifadə etmək olub. Məsələ burasındadı ki, Silvanın yıxılmasının özü təbii alınmır. Ona görə də penalti qərarı düzgün qərardı. 44-cü dəqiqədə qapımıza verilən 2-ci penalti də aşkar idi. Koxalski rəqibi kobudluqla dayandırmışdı. 76-cı dəqiqədə göstərilən yeganə sarı vərəqə də ingilislərin etdiyi düşüncəsiz qayda pozuntusuna görə idi. Deyə bilərik ki, VAR-ın köməyi ilə də olsa, hakimlər oyunun öhdəsindən gəldilər”.