"Ağır səfər məğlubiyyətindən "Qarabağ"ın cavab görüşünə ciddi hazırlaşacağı gözlənilirdi. UEFA da oyunu ciddiyə aldığı üçün İngiltərədən olan hakimlər briqadasına həvalə etmişdi. 90 dəqiqə qarşılıqlı hücumlar, gərgin mübarizə şəraitində keçdi. Belə oyunları idarə etmək referidən daha çox məsuliyyət, diqqət tələb edir və baş hakimin bir yanlış qərarı matçın taleyini həll edə bilər. Komandaların, rəqib futbolçuların bir-birinə göstərdiyi qarşılıqlı hörmət, korrekt oyun tərzi də idarəçilikdə referiyə yardımçı olurdu. Baş hakim də futbolçuların sərt oyununu bağışlamırdı, dərhal onları sarı vərəqə ilə cəzalandırırdı. Oyunun əvvəli almanların VAR-da əyləşən avstriyalı qonşusunun yersiz müdaxiləsi, "Qarabağ"ın qapısına "penalti" axtarışı ilə yadda qaldı. Fasilədən sonra sürət xeyli artdığından, futbolçular arasında ikili mübarizələr bəzi epizodlarda gərginliyə, mübahisələrə səbəb olur, referi yenidən əlini cibinə atmağa məcbur olurdu. İlk hissədə olduğu kimi, adi epizodda "nöqtə" axtaran VAR otağının sonda Maksim Medvedevin əlini görməməsi, referiyə yol göstərməməsi mümkün deyildi. Bəxtsiz anda penalti ilə cəzalandırılan "Qarabağ", gözəl futbol sərgiləməsinə baxmayaraq, şanssız halda bir xaldan məhrum oldu".