Srağagün “Qarabağ” “Nyukasl”ı qəbul etdi. Çempionlar Liqasının ab-havası şəhərdə əməlli-başlı hiss olunurdu. Xüsusən də oyun günü. 2 minə yaxın ingilis azarkeşin Bakıya axın etməsi, az qala şəhərin hər tinindən bir ingilisin çıxması alışmadığımız görüntü idi. Hətta onlar yerli mətbuata açıqlamada futbolun bəhanə olduğunu, əyləndiklərini və Bakını çox bəyəndiklərini bildirdilər. Sosial şəbəkələrdə də bir mövzu var idi - “Qarabağ”. Artıq pley-off mərhələsində oynamaq azarkeşlərin iştahını da artırmışdı. Belə ki, oyundan əvvəl “Nyukasl”ı keçsək, “Barselona” gəlsin, “Çelsi” ilə oynamışıq” kimi fikirlər də eşitmək mümkün olurdu. “Nyukasl” xəyallarda keçilmişdi.

Stadionun həyətində media nümayəndələri üçün ayrılan girişdən girdim. Kənar girişdən 10-15 ingilis azarkeşin gəldiyini gördüm. Gecədən gəldiklərini, heç qayıtmaq istəmədiklərini dedilər. Hesab təxminimi soruşdu, 2:2 dedim. Onlardan soruşanda ən təvazökarı 0:4 dedi. Açığı, ingilislər cütün taleyinin Bakıda həll olunacağına əmin idi.

Artıq bir gün əvvəldən ehtiyat stadionun içində lanç açılmışdı. Bu, VVİP bilet alanlar üçün nəzərdə tutulub. Həmin sektora biletin qiyməti 1000 manatadı İstəyirsən oyuna bu lançda TV-dən bax, istəyirsən stadiondan. Orda da hər şərait var. Hətta yemək-içmək də limitsiz.
Yemək-içmək demişkən, menyu da göz qamaşdırırdı. Birdəfəlik stəkanda çayın qiyməti 3, kofe 4 manat, marketlərdə 60 qəpiyə olan “Sirab” 3 manat, 1,3 manatlıq “Koca Kola” 4 manat, 1,2 manata satılan “Fuse Tea” 4 manat. Bunu çox uzatmaq olar. Adi, kolbasalı sendviç 5 manata satılırdı. Məsələyə marketinq tərəfdən yanaşaraq “Xırdalan” pivəsinin qiymətini daha baha qoyublar – 8 manat. Bu da normaldı. İngilislər onsuz da pivəni “gözünə təpirdi”.

Media sektor iki yerə ayrılmışdı. Şəkilli akkreditasiyası olan üçün ayrıca, şəkilsizlər üçün ayrıca. Məndə də şəkilsiz idi, aşağı tribunalarda oturdum. Burda media nümayəndələri oturmalıydı. Amma mənlə birgə vur-tut 3-4 jurnalist var idi, ya da yox. Meyxanaçı Balaəli üç sektor dəyişdi, oyun başlayanda gəlib yanımda oturdu. Mühafizəçilərin tanış simadı deyə onu və yanındakı üç dostunu rahatlıqla media üçün ayrılan yerə buraxması absurddu.

İngilis azarkeşlərin yer aldığı 28-ci sektorla bizimkilər arasında olan 27-ci sektor təhlükəsizlik məqsədi ilə boş saxlanılmışdı. Stadionun diktoru sona yaxın qonaqların nəzərinə çatdırdı ki, oyun bitəndən sonra 20 dəqiqə ərzində yerlərini tərk etməsinlər. Ədalət naminə deyək ki, bütün dünyada xatakarlığı ilə ad çıxaran ingilislər Bakıda özlərini yetərincə ədəbli apardılar. Daha bir maraqlı məqam: oyunu stadiondan 28861, “CBC Sport”un “yutub” kanalında isə 200 mindən artıq adam izləyirdi.

Qurban Qurbanovun oyunsonrası mətbuat konfransı zamanı Xoni Montiel də salona daxil oldu, bir dəqiqəyə yaxın dayandı. Çıxarmağa çalışsalar da, çıxmırdı, israrla konfransı izləmək istədiyini deyirdi. Axırda birtəhər çıxardılar.

Beləliklə, “Qarabağ” üçün ÇL həyəcanı başa çatdı. Qalır Nyukasldakı cavab görüşü ki, o da formal xarakter daşıyacaq.

MÜZƏFFƏR QULUZADƏ