Avropanın aparıcı liqalarında yenicə başa çatan “transfer pəncərəsi”ni qısaca “sakit” və ya hətta “sönük” sözü ilə xarakterizə etmək olar.

Bəlkə də bu heç kimi təəccübləndirməməlidi. Cəmi bir ayığa açılan yanvar pəncərəsi əsasən yardımçı xarakter daşıyır. Klublar, adətən, zədə üzündən sıradan çıxan oyunçusunu əvəzləmək və ya problemli mövqeyi qapamaq üçün bazara çıxır. Bir başqa kateqoriyaya da autsayderlər aiddi, elitanı tərk etmək təhlükəsi ilə üzləşən belələri xilas olmaq üçün qaçaraq heyəti gücləndirir. Xüsusən də komanda gözlənilmədən turnir cədvəlinin zirzəmisinə yuvarlanıbsa – məsələn, bu mövsümün “Fiorentina”sı kimi.

Ancaq biz yanvarın fərqli ola biləcəyini də anlayır və xatırlayırıq. Bəlkə də kimsə unudub, amma Fernando Torres “Liverpul”dan “Çelsi”yə (58,5 milyon avro, 2011), Vircil van Diyk “Sautjempton”dan “Liverpul”a (84,65 milyon avro, 2018), Filippe Koutinyo “Liverpul”dan “Barselona”ya (135 milyon avro, 2018), Bruno Fernandeş isə “Sportinq”dən MY-yə (65 milyon avro, 2020) məhz qışda keçmişdi.
2023-ün yanvarında “Benfika”dan Entso Fernandesi 121 milyon avroya alan “Çelsi” də bazarı əməlli-başlı silkələmişdi.

Bir il əvvəl “Mançester Siti” də bazarda aqressiv davrandı. Mövsüm uğursuz alındığından komanda yenilənməyə ehtiyac duyurdu, belədə klub rəhbərliyi yayı gözləmədi. “Siti” Omar Marmuş üçün 75 milyon, Abdulkodir Xusanov üçün 40 milyon və Niko Qonsales üçün 60 milyon avro xərcələdi – sonuncuya zədəli Rodrinin əvəzedicisi kimi baxırdılar. Elə onda Xviça Kvaratsxeliya da “Napoli”ni PSJ-yə 70 milyon avroya dəyişdi. Səudiyyə Ərəbistanının klubları da fəal idi. Onlar Con Duranı “Aston Villa”dan 70 milyon, Qalenonu “Portu”dan 50 milyon avroya sıralarına cəlb etdi.

Bütün bu sadaladıqlarımızın fonunda 2026-nın yanvarı açıq-aşlar tutqun alındı. Sözsüz, bəzi maraqlı sövdələşmələr gerçəkləşdi, ancaq ortada səs-küylü keçidlər yoxdu. Təsəvvür edin ki, bu dəfə hətta “Çelsi” də heç kimi almadı – London klubu isə bazarda yaşananların indikatoru rolunu oynayır.
Hə, “Mançester Siti” susmadı: “şəhərlilər” 72 milyon avroya (qışın ən baha transferidi) heyətini Antuan Semenyo ilə gücləndirdi, üstəlik Mark Qehi üçün də 23 milyon ödədi. Ancaq müdafiəçinin alınması Con Stounz, Ruben Diaş və Yoşko Qvardiolun zədəsi üzündən məcburi addım idi.

“Atletiko” da gözlənilmədən bazarda fəallıq göstərdi: “hindular” Cakomo Raspadori və Konnor Qallaher ilə vidalaşdı, əvəzində Ademola Lukman, Rodriqo Mendosa və Obed Varqası “rənglərinə bağladı”.
Son günün ən səs-küylü transferi Yorgen Strann Larsenin “Vulverhempton”dan “Kristal Pelas”a 50 milyon avroya keçidi oldu. Düzdü, bu, “qartallar”ın tarixi üçün rekord alışdı, ancaq o da ümumi sakitliyi pozmur.

Ayın ən intriqalı transferi isə “Liverpul”un “Renn”dən 20 yaşlı mərkəz müdafiəçisi Jeremi Jakeni 63,5 milyon avroya almasıdı. “Real”la “Çelsi”nin də ciddi maraq göstərdiyi fransızı fiziki gücünə və futbol intellektinə görə artıq “yeni Van Diyk” adlandırırlar. Düzdü, o, “Enfild”də yalnız yayda qədəm qoyacaq, cari mövsümü isə “Renn”də bitirəcək. Bəlkə də əla investisiyadı, ancaq Lenni Yoro ilə bağlı çəkindirici nümunə də var: o, 18 yaşında “Lill”dən MY-yə 62 milyon avroya keçdi, ancaq İngiltərədə potensialını hələ də aça bilməyib.

Top-klubların və bunlara yaxın olanların indiki sakitliyinin bir neçə səbəbi var. Həm Avropa futbolundakı, həm də klubdaxili “maliyyə feyr-pleyi” bunda önəmli rol oynayır. Məsələn, İngiltərədə son illər tələblər önəmli dərəcədə sərtləşdirilib. Elə həmin MY Semenyo ilə maraqlanırdı, ancaq “Siti” “Bornmut”a daha sərfəli şərtlər təklif etdi, belədə Mançesterin qırmızı hissəsində pulu qorumağa üstünlük verdilər ki, ertəsi, tutaq ki, sıravi əməkdaşların naharından qənaət etməyə məcbur olmasınlar.

“Arsenal” və “Bavariya” kimi bəzi nəhənglərin onsuz da güclənməyə ciddi ehtiyacı yoxdu. “Real” artıq illərdi prinsipial şəkildə qışda bazara çıxmır. “Barselona” üçün isə bu gün hər yeni transfer mürəkkəb mühasibatlıq məsələsinə çevrilir.
İtaliyada “Yuventus”un baş məşqçisi Luçano Spalletti, yəqin ki, müntəzəm zədələnən Duşan Vlahoviçlə Arkadiuş Milikin əvəzinə qabaritli mərkəz hücumçusu almaq istəyərdi, ancaq klub heç bir münasib variant tapa bilmədi. “Milan”da oxşar problemi müvəqqəti həll etdilər – Nikolas Füllkruqu icarəyə götürməklə. Hərçənd “qırmızı-qaralar” başqa forvard da ala bilərdi, ancaq Jan-Filipp Mateta tibbi baxışdan keçmədi.

Təbii ki, yayda bazar daha hərəkətli olacaq. Bir halda ki, qarşıdan ənənəvi şəkildə transfer fəallığını artıran dünya çempionatı gəlir.

"Football-plus.az"