Qışda 6-cı pilləni bəyənməyən, 4-5-ci pillələrdə olan rəqiblərdən bir neçə xal geridə olmağı özünə sığışdırmayan “Araz-Naxçıvan” rəhbərliyi günahı baş məşqçidə gördü və Elmar Baxşıyevə “yaxşı yol” dedi. Əvəzində məşqçi kimi heç bir uğuru olmayan, amma “gələcək vəd edən” Andrey Demçenkonu posta təyin etdi. Maşallah olsun, necə də doğru qərar! 3 oyun, 3 vurulan, 10 buraxılan qol, 1 heç-heçə, 2 darmadağınlı məğlubiyyət. Əhsən! Cənab rəhbər şəxslər, bunumu istəyirdiz?

Demçenkonun özəl “futbol baxışı” var. Ona görə məşq vacibdi. Əslində burda heç bir problem yoxdu. İlk baxışdan məşqin vacib olduğunu düşünməkdə heç bir problem görünmür. Amma cənab Demçenkoya görə məşq oyundan da vacibdi. Bəli. Bu səbəbdən də komandanın ulduzu Felipe Santosu “gözdən çıxarıb”, ancaq sonradan meydana buraxır. Gözünə döndüyüm Felipe də hər dəfə sonradan meydana çıxanda özünü göstərir, hələ “Sabah”a qol da vurur. Son oyunun ardından keçirilən keçirilən mətbuat konfransında bu barədə sual verdim ki, “hələ də sizin üçün məşq oyundan vacibdi?” 49 yaşlı mütəxəssis isə sualdan yayındı, “komanda olaraq uduzduq” kimi ifadələrdən yararlandı.

Demçenkonun futbol dünyagörüşünə görə, komanda 11 nəfərlə müdafiə olunmalıdı. Ola bilər, normaldı. Amma təzad ondadı ki, komanda ardıcıl iki oyunda qapısında 4 qol görür. İstəyir, bacarmır, futbolçuları əlində olan bacarığdan da məhrum edir. Bunlar 11 nəfərlə müdafiə olunub “İmişli”dən 2, “Neftçi” və “Sabah”dan 4 qol buraxır, hələ görün...
Andrey Demçenko üçün məşq futboldan o qədər önəmlidi ki, məşqdə özünü yaxşı göstərən futbolçuları özlərinə heç aid olmayan mövqedə də oynadır. Bruno Franko mərkəz müdafiəçisinə çevrilib. Hətta Rahil Məmmədovu ehtiyatında saxlayacaq qədər “güclü” “mərkəz müdafiəçisi” imiş. Franko birmənalı şəkildə cinah futbolçusudu. Mərkəzdə topu qəbul edir, özündən aslı olmayaraq cinaha meyillənir. Buna görə də mərkəzdə boşluq yaranır. Vanderson Melonu da mərkəz müdafiəçisi kimi görürük. Fiaskodu.

Yarımmüdafiənin ən yaxşılarından, yaradıcılıq baxımdan komandanın bir nömrəsi Nuno Rodriges isə Demçenko gələndən ehtiyat oyunçular skamyasının əvəzedilməzi olub. Görəsən, bu mütəxəssisə nə tapşırılıb? Bəlkə məqsəd seriya yaxalamaqdı? - qələbəsizlik seriyası. Mövsümün sonuna qədər bunu bacarmaq Muxtar Respublika təmsilçisi üçün daha rahatdı, nəinki komandanın bundan sonra avrokuboklara vəsiqə qazanmaq uğrunda mübarizəsi. Komanda “dördlük”də olmadığına görə Elmar Baxşıyevlə yollar ayrıldı. İndi isə 7-ci pilləyə düşə bilərlər. Bu gün “Neftçi” “Qəbələ”ni məğlub edəcəyi halda, belə də olacaq.
Aydın məsələdi ki, klub rəhbərliyi hazırda verdiyi qərardan peşmandı. Bir var nəticə olmasın, oyun olsun. İndi nə oyun var, nə də nəticə. Müdafiəyə önəm verən komanda hər oyuna orta hesabla 3-dən çox qol buraxır. Hücumda da inamsızdılar. “İmişli”dən başqa “Sabah”a bir qol vurulub, o da ki hesab 4:0 olanda.

“Araz-Naxçıvan”ın vəziyyəti yaxşı deyil. “Araz-Naxçıvan”ın ukraynalı məşqçi ilə uğur qazanması mövsümün sonuna qədər Naxçıvana köçməsi qədər realdı.

MÜZƏFFƏR QULUZADƏ

P.S. Bizim eldə yaxşı bir məsəl var: əri döymüş arvadı it də tutdu bir yandan... “Araz-Naxçıvan”ın yaşıl meydandakı uğursuzluqları azmış kimi, qeyri-rəsmi sahibi, Azərbaycan Futzal Federasiyasnın (AFF) prezidenti Zaur Axundovun cinayət məsuliyyətinə cəlb olunması haqda da xəbər yayılıb. O, xüsusilə külli miqdarda mənimsəmədə (Cinayət Məcəlləsinin 179.4-cü maddəsi) ittiham edilir. Cinayət işi üzrə istintaqı Baş Prokuror yanında Korrupsiyaya qarşı Mübarizə Baş İdarəsi aparır. Hələlik Zaur bəylə bağlı məhkəmə qərarı yoxdu.
Zaur Axundov həmçinin Naxçıvan Futbol Federasiyasının prezidentidi. Zaur bəyin qardaşı Ramin Axundov “Araz Naxçıvan” futbol klubunun prezidentidi. O, bir müddət əvvəl 5 milyonluq siqaret qaçaqmalçılığı ilə bağlı həbs edilib.