''Fənərbaxça'' ulduzu ilə yeni müqavilə imzaladı
Bu mövsüm ''Fənərbaxça''nın ən önəmli futbolçularından biri olan Anderson Talişka ilə bağlı müjdəli xəbər gəlib.
Braziliyalı ulduz rəhbərliyin yeni müqavilə ilə bağlı təklifini qəbul edib. Təcrübəli oyunçunun mövsümün sonunda bitməli olan müqaviləsi iki illik yenilənib. Beləliklə, ''sambaçı'' 2028-in yayına qədər İstanbul nəhənginin şərəfini qoruyacaq. İmza mərasimi bazar günü klub rəsmilərinin iştirakı ilə ''Fənər''in stadionunda baş tutub.
Talişka imzanın ardından bunları deyib: ''Bu klubda daha iki il qalacağım üçün xoşbəxtəm. Rəhbərliyə və klubun hər bir işçisinə təşəkkür edirəm. Acun Ilıcalının bura gəlməyimdə böyük əməyi olmuşdu. Onu da unutmuram. Bu forma üçün mübarizə aparmaqda, qollarımla komandama yardım etməkdə davam edəcəm. Fanatlarımız da dəstəyi davam etdirsinlər. Mənə göstərdikləri sevgiyə görə onlara da təşəkkür edirəm. Onlar üçün əlimdən gələni edəcəm. Mənə güvənə bilərlər''.
İddialara inansaq, Talişka maaşının azaldılmasına razılıq verib. Onun illik maaşı 6,5 milyon avrodan 5 milyon avroya endirilib. Tam adı Anderson Souza Konseysao olan 31 yaşlı hücumameyilli yarımmüdafiəçi ötən mövsümün qış transfer dönəmində, yəni bir il öncə ''Əl-Nəssr''dən heyətə cəlb olunub.
Bu mövsüm 33 oyunda vurduğu 19 qolla komandasının ən məhsuldar oyunçusu statusunda olan Talişka indiyə qədər ''sarı-lacivərdlilər''də 56 rəsmi oyunda 31 qol, 6 məhsuldar ötürməlik performans sərgiləyib.
Digər xəbərlər
