''Vulverhempton''dan mərkəz müdafiəçisi Emmanuel Aqbadunun 18 milyon avroya transfer olunduğunu rəsmən açıqlayan ''Beşiktaş'' Türkiyədə ''pəncərənin'' bağlandığı son gündə - fevralın 6-da daha iki keçidi tamamlayıb.

Əvvəlcə ''Marsel''dən Əmir Murilyo ilə ''3,5+1'' illik müqavilə imzalandığı açıqlanıb. Maddi detallar rəsmi açıqlanmasa da, Türkiyə mətbuatının yazdığına inansaq, İstanbul nəhəngi bu futbolçu üçün 5 milyon avro ödəyəcək. Müqavilədə maksimum 1 milyon avro həcmində bonuslar da var.

Fevralın 11-də 30 yaşı tamam olacaq panamalı futbolçu əsasən sağ cinah müdafiəçisi kimi oynasa da, universallığı ilə diqqət çəkir. Daha öncə ''Nyu York Red Bulls'' və ''Anderlext''də oynamış Murilyo 2023-dən ''Marsel''in şərəfini qoruyurdu. Bu mövsüm 25 rəsmi oyunda aktivinə 2 qol, 4 məhsuldar ötürmə yazıb. Panama yığmasında isə 90 oyuna çıxaraq 9 qol vurub.

Mərt Günokun ayrılmasından sonra Ərsin Destanoğlunun performansından razı qalmayan ''Beşiktaş'' qapıçı problemini isə Devis Vaskes ilə yoluna qoyub. Kolumbiyalı əlcək sahibi ''Roma''dan mövsümün sonuna qədər icarəyə götürülüb. Maraqlıdı ki, o, bu mövsüm İtaliya klubunda heç bir rəsmi oyuna çıxmayıb.

Ümumiyyətlə, 27 yaşı olmasına baxmayaraq Vaskes indiyə qədər peşəkar karyerasında cəmi 89 rəsmi oyuna çıxıb və bunların 16-da qapısını toxunulmaz saxlayıb. Daha öncə ''Milan'', ''Şeffild Uensdey'', ''Askoli'' və ''Roma''da oynamış Vaskesin indiki transfer dəyəri 1,5 milyon avro civarındadı.