Türkiyə futbolunun məşqçi dəyişiklikləri baxımından Avropada ön sıralarda olması heç kimə sirr deyil.

"Football-plus.az" xəbər verir ki, qardaş ölkədə məşqçilərin tez-tez əvəzlənməsi artq adət halını alıb. Özü də söhbət təkcə iddiasız klublardan getmir. Amma təbii ki, istisnalar da var. “Qalatasaray” – Okan Buruk işbirliyini xatırlamaq kifayətdi. 52 yaşlı mütəxəssis İstanbul nəhənginin başında artıq 4-cü mövsümünü keçirir.

Adətən, qeyri-sabit çıxış edən Anadolu təmsilçilərində bir məşqçinin uzun müddət işləməsi faktiki mümkünsüz görünsə də, əslində buna dair da əla bir örnək var. Söhbət “Göztəpə”nin çalışdırıcısı Stonimir Stoylovdan gedir. Bu məqamda dərhal bir mühüm xatırlatma edək. “Göztəpə” Türkiyə futbolunda xarici investorlar tərəfindən idarə olunan yeganə klubdu. Bolqarıstanlı mütəxəssis 2023-ün noyabrında İzmir klubunun başına keçərkən onun bu qədər uzun müddət bu klubda qalacağını az adam proqnozlaşdırardı. Özü də “sarı-qırmızılar” həmin vaxt 1-ci liqada çıxış edirdilər. Daha öncə “Levski” və “Astana”nın başında diqqətçəkən uğurlar qazanan təcrübəli mütəxəssis dərhal nəticə verməyə başladı. O, ilk cəhddəcə “Göztəpə”ni elitaya daşıdı. Komanda superliqadakı debüt mövsümünü 8-ci yerdə tamamladı. 2025-in yayında “Göztəpə” bir Anadolu klubu üçün rekord məbləğə - “20+5” milyon avroya Romulonu “Leyptsiq”ə satdı. Əsas qol silahı ilə vidalaşmasına baxmayaraq, izmirlilər bu mövsüm də nəticələri ilə diqqəti çəkirlər. “Fənərbaxça” kimi çempionluğa iddialı klubdan mövsümün hər iki oyununda xal almağı bacaran “Göztəpə” 19 turdan sonra “Beşiktaş”ın önündə - 4-cü pillədə qərarlaşıb. Bu gedişlə bu komandanın avrokuboklara vəsiqə qazanması sürpriz olmayacaq. Müdafiə planında da diqqət çəkən “Göztəpə” 19 turdan sonra ən az (11) qol buraxan komandadı.

“Fənər”ə qarşı son matçda Stoylov həm də adını klub tarixinə yazdırdı. O, “Göztəpə”nin başında superliqada 55-ci oyuna çıxdı. Bolqarıstanlı çalışdırıcı bununla da Tamər Tunanı geridə qoyaraq klub tarixində Türkiyə çempionatında ən çox oyuna çıxan ikinci məşqçiyə çevrildi! Bu göstəricidə Stoylov yalnız klubun əfsanəsi Adnan Süvaridən geri qalır. Süvari 1960-80-ci illərdə fərqli dönəmlərdə ümumilikdə klubun başında 350 çempionat oyununa çıxıb (130 qələbə, 120 heç-heçə, 100 məğlubiyyət). “Göztəpə”nin Stoylov ilə 55 oyundan 23 qələbə, 17 heç-heçə, 15 məğlubiyyətlə ayrıldığını nəzərə alsaq, o, klub tarixində ən yaxşı (41,8) qələbə faizinə malik olan məşqçi statusundadı. Adnan Süvaridə bu göstərici 37,1 faizə bərabərdi.

Ümumilikdə “Göztəpə” Stoylovla keçirdiyi 86 rəsmi oyundan 44 qələbə, 22 heç-heçə, 20 məğlubiyyətlə ayrılıb (top fərqi – 149:79).