Türkiyə çempionatından daha bir istefa xəbəri var. Belə ki, “Girəsunspor”un baş məşqçisi Hakan Keleş öz istəyi ilə istefa verib.

"Football-plus.az" xəbər verir ki, elitada qalmaq uğrunda mübarizə aparan Girəsun təmsilçisi bazar ertəsi əsas rəqiblərindən “İstanbulspor”a səfərdə minimal hesabla məğlub oldu.

51 yaşlı mütəxəssis qarşılaşmadan bir gün sonra rəhbərliyə istefa verdiyini bildirdi. Əslində Keleş hələ bundan əvvəlki matçdakı hərəkəti ilə ayrılmaq istədiyinə işarə vurmuşdu. O, “İstanbul BŞ”yə qarşı ev matçından (2:5) sonra fanatlara əl sallayaraq onlarla vidalaşmışdı. Amma Keleşin “Girəsunspor”da gördüyü iş alqışalayiqdi. Çünki Türkiyə futbolunda məşqçilərin əlcək kimi dəyişdirildiyini nəzərə alsaq, Keleşin 3 ilə yaxın bu klubda çalışması maraqlı məqamdı.

Bu mövsüm superliqada ondan daha uzun müddət bir klubda çalışan yalnız bir məşqçi var idi. Söhbət 2019-un yayından “Sivasspor”un başında olan Rza Çalımbaydan gedir. Hakan Keleş isə girəsunluların başına 2020-nin iyulunda keçmişdi. Həmin vaxt klub 1-ci liqada çıxış edirdi.

“Girəsunspor” 2020/21-də elitaya yüksəlməyə əsas namizədlərdən sayılmasa da, 2-ci yeri tutaraq sürpriz şəkildə bunu bacardı və 44 ildən sonra Türkiyə çempionatında oynamaq haqqı qazandı. Bütün bu müddət ərzində dəfələrlə Keleşin istefası gündəmə gəlsə də, rəhbərlik örnək davranış sərgiləyərək onun arxasında dururdu.

Məsələn, ötən mövsüm komanda ilk 8 tura 5 xal toplayaraq sondan əvvəlki pillədə qərarlaşmışdı. Amma rəhbərlik bu məşqçi ilə yoluna davam etdi və “Girəsunspor” elitada qalmağı bacardı. Bu mövsüm isə bu kollektiv düşmə zonasında qərarlaşmasına baxmayaraq, səfərdə həm “Qalatasaray”ı, həm də “Fənərbaxça”nı yenməsi ilə diqqəti çəkib.

Bu qədər çətinliklərdən üzüağ çıxan məşqçinin bu dəfə ən həlledici məqamda istefa verməsi qəribə görünür. 30 oyuna topladığı 27 xalla 16-cı pillədə qərarlaşan və xilasedici zonadan 5 xal geridə olan “Girəsunspor” həftəsonu öz meydanında “Fənərbaxça” ilə qarşılaşacaq.