"Bu oyuna qədər cari mövsümdə "Liverpul"un Çempionlar Liqasında 1, premyer-liqada 5 oyununda iştirak etmişdim. "Enfild'də matç izləmək uşaqlıqdan bəri ən böyük arzum olub. Həmin vaxtlar ağlıma gəlməzdi ki, bir gün "Liverpul" "Enfild"də "Qarabağ"a qarşı oynayacaq və görüşdə "Qarabağ" formasıyla iştirak edəcəm. Çox xoşbəxtəm ki, bu xəyal gerçək oldu. Reallaşması zaman alacaq deyə heç bir xəyalınızdan vaz keçməyin deyiblər. İnsan bu ifadənin düzgünlüyünü uzun müddət bir şeyi istəyib sonra əldə edəndə daha yaxşı anlayır. Oyun günü "Enfild"də, həmişə olduğu kimi, möhtəşəm atmosfer vardı. Komandamız qalib gəlməsə də, növbəti mərhələyə keçdiyinə görə hesab bizi üzmədi... Əslində bir az üzüldüm... Təbii ki, "Qarabağ"ın qələbə qazanmasını istəyirdim. Düzdü, futbolu "Liverpul"la, Cerrardla ("Liverpul"un əfsanəvi futbolçularından Stiven Cerrardı nəzərdə tutur - red.) sevmişəm. Lakin "Qarabağ"ın yeri məndə başqadı. Çünki bu komanda mənim üçün ailə kimidi. "Liverpul" dünya futbolunda iz qoymuş, tarixi, ənənələri, dəst-xətti olan klubdu. "Qarabağ" isə indi-indi adından söz etdirir. Bu baxımdan "Qarabağ"ın daha çox dəstəyə ehtiyacı var".

"Püşkatmadan əvvəl dua edirdim ki, növbəti rəqib "Nyukasl" olsun. "Qarabağ"ın yenidən bura - İngiltərəyə gəlməsi mənim üçün böyük hədiyyədi. Həm də PSJ daha güclü, çətin rəqibdi. Ümid edirəm ki, "Qarabağ" "Nyukasl"ı mübarizədən kənarlaşdıra biləcək".