Bu transfer dönəmində Türkiyənin ən fəal klublarından olan, Entoni Musaba və Matteo Genduzi kimi isimləri heyətinə qatan ''Fənərbaxça'' bir ulduzunu əldən buraxmağa yaxındı.

"Football-plus.az" xəbər verir ki, söhbət Yussef Ən-Nəsiridən gedir. Türkiyə karyerası o qədər uğurlu keçməyən, aşağı məhsuldarlığa görə tənqid olunan təcrübəli mərakeşli forvard barədə tez-tez transfer iddiaları ortaya atılır. Bu dəfə isə məsələ ciddidi və artıq iddia çərçivəsini aşmaq üzrədi. Belə ki, ''Yuventus''un idman direktoru Marko Ottolini Ən-Nəsiri ilə bağlı ''Fənər'' rəsmiləriylə danışıqlar aparmaq üçün İstanbula gəlib! Bu xəbəri həm İtaliya mətbuatı, həm də türkiyəli insayder Yağız Sabuncuoğlu paylaşıb. Hələlik maliyyə detalları barədə məlumat yoxdu. Ən son Mərakeş yığması ilə Afrika Millətlər Kubokunda çıxış edən və turniri qolsuz tamamlayan Ən-Nəsiri bu mövsüm ''sarı-lacivərdlilər''də 25 rəsmi oyuna çıxaraq hesabına 8 qol, 1 məhsuldar ötürmə yazıb.

''Fənər''in ''Aston Villa'' ilə oyunundan öncə də Ən-Nəsiri ilə bağlı maraqlı bir yeni iddia ortaya atıldı. Sən demə, ''Aston Villa'' da İstanbul nəhənginə rəsmi təklif irəli sürübmüş. Əslində premyer-liqa təmsilçisinin əsas hədəfi ''Beşiktaş''lı Temmi Abraham idi. Təcrübəli forvardın özü ilə razılıq da əldə olunub. Amma ingilislər ''Beşiktaş''la anlaşa bilməyiblər. Bu üzdən diqqəti Ən-Nəsiriyə yönəldiblər. Belə görünür, 28 yaşlı forvard Türkiyə karyerasının son günlərini yaşayır.